Претходен број

Кацин: Грција провоцира конфликт со Македонија

Брисел - Европарламентарецот Јелко Кацин ја обвини вчера Грција дека намерно ја провоцира Македонија и, труејќи ја атмосферата, отвора простор за нови посериозни конфликти. Неговата реакција уследи по информацијата дека Атина не му дава дозвола за слетување на државниот авион, со што стави вето и на учеството на шефот на државата, Бранко Црвенковски, на меѓународен настан организиран не од неа, туку од УНЕСКО.

„Ова, очигледно, не е изолиран инцидент.Ова е дел од однапред планирана политика и свесна провокација од страна на Грција, која само додава масло на веќе тензичните меѓудржавни релации. Последиците од емоционалната блокада, која ја труе политичката атмосфера во регионот и пошироко, ги надминаа границите на прифатливоста и се закануваат да се прошират во опасни конфликти во други области. Време е да ги одбраниме фундаменталните принципи на меѓудржавните односи и време е за одлучна акција и реакција од европските институции“, изјави вчера Кацин.

Притоа, тој направи паралела меѓу оваа забрана и таа за прелетот на МАТ, заклучувајќи дека сите малтретирања низ кои поминаа патниците во авионот ќе му се случеа и на претседателот Бранко Црвенковски, ако не донесеше одлука да го откаже учеството на земјата на овој меѓународен собир. Таквата одлука, според Кацин, била логична последица на намерните провокации од Грција, која за сето тоа испратила неубедливо објаснување.

„Не е вистина дека грчките власти дејствувале во согласност со правилата и воспоставената практика“, тврди Кацин, додавајќи дека во случајот со МАТ била сменета маршрутата на летот, авионот бил принуден да слета во Истанбул, да наполни повторно гориво и да најде нова рута до Египет, од што компанијата претрпела штета, а на патниците им бил скратен одморот. (С.Ј.)