Поглед

Двојни аршини

Тамара Грнчароска

„Јован Бигорски е Албанец“ вака во средата во Тетово албанските студенти, засилени со средношколци и основци-Албанци од градот го изразија својот револт поради Македонската енциклопедија, додека манастирот „Бигорски“, 100 километри подолу и неколку часа порано, го спасуваа токму нивните браќа по вера и етникум, на кои притоа не им беше ни на крај на ум да ги сквернават на таков начин припадноста на верските реликвии и обележја на една нација.

Додека во Дебарско се покажуваше соживот, пред се', солидарност и како треба меѓусебно да се почитува и помага, во Тетово, противејќи се на енциклопедијата создадена од една институција, која ги навредила и обесправила, студентите-Албанци - како прогресивна сила во секое општество - им го направија на Македонците истото тоа против што се кренаа. Во што се покажаа поразлични студентите во Тетово од она за што го обвинија МАНУ? Во камењата што ги фрлаа врз македонските домови или во повиците „смрт за Македонци“ и „вратете се зад Карпатите“?

Се покажаа ли поразлични и албанските интелектуалци и политичари кои пак не покажаа доблест да се оградат од она на што се повикуваше во Тетово, како што македонските интелектуалци и политичари се оградија од напишаното во енциклопедијата. Истите оние албански претставници кои пред десетина дена се сликаа пред МАНУ во потрага по вистината и честа за својот народ, не се оградија ниту од палењето на македонското знаме во Приштина, иако го направија тоа косовскиот претседател Фатмир Сејдиу и премиерот Хашим Тачи. Но, не и тие на кои Македонија им е татковина. Барајќи ја вистината за себе, албанските студенти, политичари и интелектуалци од Македонија се загубија во сопствениот гнев и во сопствениот национализам.