Си велам

Лева рака, десен џеб

Ерол Ризаов

Нашата нова, најсилна идеологија е како да се преживее

К оја е препознатливата идеологија на нашите најголеми политички партии. Во што се разликуваат нашата левица и десница.

Во Македонија, со најсиромашно население во Европа, е инсталирана нова, најсилна партиска идеологија која се вика како да се преживее во екстремни услови. Десницата и левицата си ги менуваат своите седишта, па сега главната идеологија се вика работа и папо, или парче леб. Ако сакате посоодветно, да не звучи многу социјално и мизерно, македонската лева и десна опција може слободно да се нарече - лева рака, десен џеб.

Всушност, двете македонски партии кои ја добиваат редовно најголемата довербата на граѓаните во изминатите 21 година ми личат да двете грпки на една камила. Еден организам храни два израстока кои не можела да ги исправи еволуцијата ни по милиони години. Се' друго во споредба на овие две партии со камилите е непристојно, бидејќи овие пустински бродови се многу скромни. Малку јадат и со денови не пијат вода. А, многу работат и се од огромна корист на бедуините кои се хранат, облекуваат, преживуваат благодарение на камилите. Кај нас е обратно, нашите партии многу јадат, многу пијат, многу трошат, малку работат, сеат омраза и го делат народот за да владеат со него.

Еве неколку клучни докази за грпките насадени на нашиот организам. СДСМ, денешната опозиција, му префрла на ВМРО-ДПМНЕ за недостиг од патриотизам во врска со одбележување на 100-годишнината од албанското знаме. Како тоа ќе го славиме знамето на Шиптарите кои го палат македонското знаме. Типично вмровски и десничарски. ВМРО-ДПМНЕ возвраќа. Секогаш кога СДСМ е во опозиција, Македонија се задушува во дестабилизација и лоши меѓуетнички односи. Ептен левичарски и сдсмовски. Социјалдемократите во опозиција жестоко обвинуваат за предавство на националните интереси: каква е таа патриотска амнестија на Албанци воени злосторници надвор од судовите. Македонските демохристијани како левоориентирани демократи возвраќаат: мора да се донесат тешки политички одлуки кога е во прашање стабилноста на државата. Десницата грми дека меѓуетничките судири ги стимулира левицата за да ја освои власта, а левицата загрижено предупредува дека меѓуетничките огнови ги палат коалиционите партнери на власт и си играат со оган само да ја освојат власта.

Што се случува кај двете најголеми и спротивставени албански партии. Албанските социјалдемократи стационирани кај ДУИ велат дека заминале во планина, во партизани, во борба за слобода и правдини. Десницата во ДПА возвраќа дека тоа е најголемата измама за власта да се освои со крв и тероризам. Суштината на идеолошката војна меѓу албанската левица и десница се сведува на тоа што двете партии ги радикализираат и делат Албанците, обвинувајќи се меѓусебно дека ништо не направиле за својот народ. Опасно се приближуваат до ветувањето дека Македонија треба да се подели по етнички граници, верувајќи дека тоа ќе им донесе поделба на власта со македонските партии. А, ако друг им ги оствари ветувањата, не знам што ќе делат и едните и другите.

Социјалдемократите предупредуваат на сиромаштија и невработеност најголема во Евр��па. Истото тоа го правеа вмровците кога беа пред шест години во опозиција. Сега се правдаат дека ја намалиле за неколку проценти невработеноста со бришење на луѓето од евиденција кои остареле чекајќи работа. Социјалдемократите опоменуваат дека власта не презема ништо за експлозијата на цените на бензините. А власта мудрува дека високата цена на нафтените деривати нема да предизвика синџирести реакции на поскапување на другите производи и оти се работи за економски закономерности и неизбежни светски трендови. Ако ги свртите страниците на весниците од пред седум-осум години и пред 15 години, ќе ги најдете истите обвинувања на ВМРО-ДПМНЕ и истите оправдувања на СДСМ. Десницата се фали дека им поделиле 250 милиони евра на земјоделците како субвенции. Левицата одговара дека парите не стасале до сиромашните земјоделци и дека ваквото делење пари без точна адреса нема врска со реформи во земјоделството, туку чист популизам што ги уништи сиромашните земјоделеци. Социјалдемократите предупредуваат на промашени приоритети и скап кич со изградба на „Скопје 2014“, а вмровците прашуваат што тие изградиле. Вмровците во вознес се во потрага по нов антички идентитет и пославно минато, а социјалдемократите прашуваат зошто се сатанизира словенското потекло на Македонците и се премолчува антифашистичката војна во Македонија на сметка на Александар Македонски Со години ги слушаме истите кавги, истите надмудрувања, истите обвинувања. Едни опоменуваат за крупни грешки, други се оправдуваат, па потоа ќе си ги променат местата и ќе си продолжат да си владеат на истиот начин.

Покрај злоупотребите на чувствителните меѓуетнички и меѓуверски односи кои навистина се опасност број еден за стабилноста на Македонија, покрај прерипнување и игнорирање на вистинските економски реформи и од двете страни, еве уште неколку примери за разликите меѓу социјалдемократите и конзервативците кога се на власт и во опозиција. Вмровците обвинуваат дека социјалдемократите и' го наденаа на Македонија грдото и срамно име ПЈРМ. А социјалдемократите возвраќаат дека најсилен адут за хашката пресуда во наша корист со која толку се гордеат вмровците беше токму тоа име, односно спречувањето на Грците да влеземе во НАТО со тоа име со кое сега бараме да станеме членка на НАТО. Вмровците обелоденија дека проблемот со името можел поволно да биде решен уште пред повеќе години, ама комуњарите не сакале да го решат. Социјалдемократите открија дека вмровците, всушност, не сакаат да влеземе ниту во НАТО, ниту во ЕУ за да владеат без контрола. Вмровците викаат на цел глас дека сите несреќи на граѓаните произлегуваат од 15-годишното владеење на СДСМ, а сите успеси се нивно дело. А поранешните комунисти тврдат дека никој не и' нанел поголеми штети на Македонија од 15-годишната вмровска власт која прерасна во диктатура.

Е па, почитувани читатели, ова набројување нема крај. Допишете ги вие тие редови. Мојот став е дека нашата лоша власт и нашата лоша опозиција лицемерно не' влечат за уши и нос сите овие години, обвинувајќи се меѓусебно за сето она што не го сработиле и едните и другите.