Поглед

Монодрама во Тулуз

Димитар Чулев

Дури и Бин Ладен беше „среден“ пред и да сфати дека тоа му се случува... но „следбеникот“ на Ал Каеда од францускиот град Тулуз, цели три дена ја малтретираше француската и светската јавност. Еден „тер��рист“ ја повлече за нос целата државна полиција со специјалните безбедносни служби, анти терористичките и така натаму бригади „наоружани“ со опрема на која може да им позавиди и Том Круз во „Невозможна мисија“.

Никој не знае што се случувало зад полициските ленти оградени околу квартот и дали специјалците немаа солзавец, на пример, да го принудат 23 - годишникот да излезе, да се предаде или, ако веќе решил - да се самоубие. Убиецот на седум лица од кои три ученици и еден учител во локалното еврејско улчилиште, и не би имал што нормално да каже во одбрана, па и да била намерата на француските власти да го фатат жив.

Оттаму, не е јасно дали и кому му требало одолговлекување на опсадните дејанија кои на крајот се претворија во лоша монодрама во која главниот лик од час во час преку полициско воки-токи се исповедаше пред аудиториумот: Дека бил член на Ал Каеда, неќел да се самоубие но прифатил да убива, дека го правел тоа во име на палестински деца, но и заради она што Франција некогаш го правела во Алжир од каде се неговите корени. Човекот на момент заличе на норвешкиот Брејвик...

Две работи се наметнуваат за размислување: дека интеретничките односи во Франција се многу пореметени кога продуцираат вакви настани. И второ, дека инцидентот одлично „легна“ во предизборната кампања на страна на Саркози кој јавно „ги прозива“ имигрантите и оние кои не успеаја да се вклопат во мултикултурниот модел кој во Франција.