За оцрнување на Бошкоски се впрегна и МРТ

Генералниот директор Ефтим Гаштов одбегна да одговори зошто дозволува злоупотреба на националниот сервис

Светлана Унковска


Серијалот со објавувањето на видеоснимките на „Јутјуб“ со кои Љубе Бошкоски се претставува како предавник што го наклеветил Јохан Тарчуловски добива нови димензии. Во последните видеоматеријали објавени на Интернет-мрежата зад кои повторно стои наводен Красимир Божинов од Бугарија, Бошкоски наведува дека документот што тој го чита пред хашкиот истражител го добил од поранешниот министер за одбрана Владо Бучковски. Во првите снимки ги чита деталите од тој документ каде што е наведено како течела подготовката, но и дека наредбата за акцијата во Љуботен во 2001 година ја издал тогашниот претседател Борис Трајковски.

Но, тука не запира машинеријата за медиумско-политички линч на Бошковски, па во оваа пресметка влезе дури и националниот радиодифузен сервис, кој на Првиот канал и на Собранискиот канал со кајрони ги најавуваше снимките именувани како „предавството на Љубе“, а во ист тон беше и емисијата „Отворено со народот“. Во оваа емисија Владо Поповски, ексминистер за одбрана и тогашен советник на претседателот Трајковски, изразува сомневање во веродостојноста на документот што го чита Бошкоски пред хашкиот истражител и дека воопшто Трајковски издал наредба за акцијата во Љуботен. Тој појасни за „Утрински“ дека неговите сомневања се темелат врз три основи што произлегуваат од тоа што самиот документот е строго доверлива државна тајна и не може да излезе толку лесно во јавноста.

„Уверен дека не постои акт на претседателот на Македонија со кој наредува воена акција, која според законите претседателот и врховен командант наредува исклучиво со указ и со писмена наредба пратена до началникот на Генералштабот, а таков акт не постои. Во основа, тој има исклучиво интерен карактер со кој се информира и министерот. Карактерот на разузнавачки документи и особено фактот дека тој акт не може да се наоѓа надвор од Секторот за безбедност и разузнавање ми дава за право да се сомневам во неговата веродостојност. Не можат да го имаат ни министерот ни претседателот, а поседувањето таков документ повлекува одредена одговорност“, објаснува Поповски.

Генералниот директор на МРТ, Ефтим Гаштов, вчера одбегна да одговори зошто дозволува ваква злоупотреба на националниот сервис. Не' упати прашањата да му ги доставиме на негов и-мејл, но не одговори на нив.

Остра осуда пристигна од Советот на честа при Здружението на новинарите на Македонија, од каде што реагираат на кршењето на принципите на професионалното новинарство и претворање на МРТ во алатка за пресметка на одредени личности, сведена на ниво на брутална х��јка и отворен линч против Љубе Бошковски.

„Кајронот ’Најнови видеозаписи од предавството на Љубе на ‘Јутјуб‘!!!’ што одеше во текот на 6.12.2009 година за време на другите ТВ-содржини, како и со содржината на своевидното ’ТВ-искажување’ како вовед во емисијата ’Отворено со народот’, која во повеќе наврати се емитува и реемитува на Првиот и на Собранискиот канал на МТВ, во кое директно се обвинува Бошкоски за предавство, ги прекрши сите норми на објективно и независно информирање и, дефинитивно, изврши професионална капитулација“, реагираат од Советот на честа при ЗНМ. Ова тело забележува дека таквата жестока пропагандистичка реторика не само што не е професионална туку е исклучително опасна, бидејќи поттикнува насилство и се загрозува безбедноста со објавување еднострани обвинувања, без притоа да се чујат и аргументите од другата страна. Фактот дека овие содржини се реемитуваат укажува на тоа оти станува збор за намера да се постигне токму таков ефект.

„МРТ е должна да ги почитува професионалните принципи и на различните интереси во општеството да обезбеди рамноправен пристап, да обезбеди слобода и плурализам на изразување, како и да спречи секаков облик на нетолеранција“, сметаат од Советот на честа, притоа повикувајќи го Советот за радиодифузија да преземе чекори за спречување на натамошното непрофесионално и агресивно „новинарство“ на јавниот радиодифузен сервис кој е должен да емитува програми од јавен, а не од партиски и друг интерес.

И по малку повеќе од две недели од објавувањето на првите снимки, јавноста е под постојано сценарија и под медиумски сензационализми од типот „го фативме предавникот“, обидувајќи се колку што е можно повеќе да го дискредитираат Бошкоски. Се' погласни се и од Здружението за поддршка на Јохан, кои барајќи начини како повеќе да го оцрнат Бошкоски, го занемаруваат фактот дека така го доведуваат во опасност и Тарчуловски, за кого во Хаг се' уште е во тек жалбената постапка за намалување на казната.