Поглед

Обиколница на глупоста

Билјана Ангеловска

Не треба да се биде голем математичар за да се пресмета дека патарината на скопската обиколница за некого ќе биде голема добивка, а за Скопје чиста загуба. Доколку консултантот предвидел дека обиколницата во пакет треба да привлече концесионери за останатите македонски патишта, што се користат само за мештаните да одат на гости кај роднините во Романовце, или кога селаните од Миладиновци сакаат да прошетаат по штипските сокаци, тогаш, предвидувањата му се точни. Бидејќи, секој со малку чувство за правење пари ќе ја лапне мамката и ќе ја земе Источната концесија, во која ќе треба да вложи околу 400 милиони евра, а ќе ќари 850.

Во обиколницата, барем во првите години, нема да треба ништо да се вложува. Се разбира, само во изградба на наплатна рампа. Тоа е нов објект што, со оглед на интензитетот на сообраќај, очигледно долги години ќе остане нов. Уште кога ќе се воведе патарина, дефинитивно бројот на возила ќе станува се' помал. Многу ме интересира во кој град во Европа министерот Миле Јанакиески видел да се плаќа патарина на кружен прстен. Или можеби министерот патува исклучително со авион, па затоа не знае како е да се движи по земја!

Во градовите што држат до градскиот ред, всушност, се плаќа за да се влезе во центарот. Кај нас, влезот е слободен. Но, затоа се плаќа за возење околу Скопје. А, во градот може да влезе секој што сака, по скопските улици возат и тешки возила и шлепери и мешалки за бетон... За тоа никој никого не казнува, но никој и не одговара. Бадијала било седумгодишното чекање да се изгради обиколницата. Сега роднините од Маџари ќе одат на гости во Ѓорче Петров повторно преку центарот на Скопје. Нема да ја користат експресната сообраќајница, ама нема ниту да плаќаат. Ништо не е сменето.