Претходен број

Црквата ги доби плажите во Градиште

МПЦ не открива како во иднина ќе стопанисува со имотот на охридското крајбрежје

Катица Чангова

Плажите во Градиште, една од најатрактивните локации на брегот на Охридското Езеро, ги доби Црквата, потврдија за „Утрински весник“ извори од МПЦ. Во сопственост на црквата „Света Богородица“ од Пештани, која е дел од Дебарско-кичевската епархија, се вратени четири парцели од 6.500 квадратни метри.

За ова барање од денационализацијата позитивна одлука донела посебната Првостепена комисија при Министерството за финансии, која се занимава исклучиво со предмети што се однесуваат за верските заедници.

Веста за враќање на првите квадрати национализиран имот во Градиште за кој се борат половина селани од Пештани вчера ја потврди и митрополитот Тимотеј.

„Плажите во Градиште се наши. Ги добивме пред почетокот на летната сезона“, кусо одговори владиката на Дебарско-кичевската епархија Тимотеј. Црквата не открива како во иднина ќе стопанисува со имотот во Градиште.

Радоста дека нешто се придвижи во заглавената денационализација на Градиште вчера не ја криеја ниту претставниците од Здружението за враќање на одземените имоти од Пештани. Оттаму информираат дека Црквата со правосилно решение добила во владение три плажи, ресторанот и шанковите со кои работеле закупци, како што е, на пример, „Скопско екстра“.

Пештанци се оптимисти дека државата ќе има добра волја да постапи на истиот начин и со другите сопственици на Градиште, чии предмети цели осум години патуваат низ лавиринтите на институциите.

„Во различни фази се предметите на пештанци. Тие очекуваат да ја вратат сопственоста на 32 парцели, односно на имот од 150.000 квадратни метри. За осум парцели 36 семејства добија првостепени решенија. Меѓутоа, Правобранителството се жалеше, па постапката отиде пред Управниот суд, кој пак реши да ги врати барањата повторно кај Првостепената охридска комисија“, ни изјави вчера Ѓорѓи Танески, претседател на Здружението за враќање на одземените имоти од Пештани.

Тој се надева дека Комисијата надлежна за Охрид ќе мора да се изјасни многу брзо по предметите затоа што повисоките инстанции веќе ја признале сопственоста. „Време е да престане вртењето во маѓепсан круг и бескрајните бумеранг-игри. Случајот со Црквата е решен, истото тоа го очекуваме и ние“, нагласува Танески.

Со Градиште, велат пештанци, бесправно стопанисуваат закупци откако го добија про��торот со приватизацијата на туристичката фирма „Инекс Горица“.

За сопственоста на атрактивниот камп „Градиште“ во близина на Охрид ќе решава Стразбур. Четири семејства од Пештани, незадоволни од решенијата на правосудните институции во Македонија за предмет од денационализацијата што се однесува на осум локации во автокампот „Градиште“, се пожалија кај Меѓународниот суд за човекови права. Тие се цврсто убедени дека правдата е на нивна страна и дека за половина година Стразбур ќе ги реши нивните барања откако претходно добија потврда дека нивниот предмет е архивиран и влезен во процедура.