МАЈКЛ ЏЕКСОН

И по смртта, на суд поради неплатени сметки

Покојниот пејач никако да го остават да почива во мир. Не само што постојано се јавуваат луѓе кои тврдат дека се негови деца и имаат право на имот или сакаат да го ексхумираат телото за повторна обдукција, сега, кралот на поп-музиката е повторно на суд - поради неплатени сметки.

Имено, Џексон е тужен од човекот што му ја изнајмувал вилата во Лос Анџелес, во која пејачот живеел помеѓу 2008 и 2009 година. Господинот Анер Иглесијас поднел тужба во која бара повеќе од 250.000 долари од Мајкл Џексон и неговите три деца поради штетата што ја нанеле, додека живееле на имотот. Тој смета дека се оштетени мебелот, техничките апарати, како што се алармот, телефонот, но и делови од дворот на куќата.

Иглесијас тврди дека пејачот знаел за неговата должност кон имотот, но не успеал да плати пред неговата ненадејна смрт во јуни 2009 година. Додаде дека ни малку не му е драго што ваквите нешта мораат да бидат презентирани на суд, но, едноставно, не знае како поинаку да се надомести направената штета на неговиот имот и можноста тој да се продаде за повеќе од 13 милиони долари на пазарот.