Познатите го оживуваат латинскиот во училиштата

Тетоважите на славните личности, како што се Дејвид Бекам и Анџелина Џоли, придонесуваат за популаризација на античкиот јазик

Се' поголем број ученици инсистираат на изучување латински јазик во своите училишта. Мотив плус за нивните барања се актуелните тетоважи на латински јазик ��а познатите личности, кои го оживуваат античкиот јазик во училишните клупи.

Учениците се' повеќе бараат да го изучуваат овој предмет, според бордот за испити, додека истетовираните познати личности, како што се Дејвид Бекам и Анџелина Џоли придонесуваат за зголемување на реномето на латинскиот јазик. Бордот за испити лансираше нови квалификации за изучување на латинскиот јазик, кој за своја цел ги има тинејџерите, бидејќи средните училишта се' повеќе го нудат овој јазик како предмет, без разлика дали станува збор за дел од наставниот план или како дополнителна настава.

Сепак, испитувачите ги повикуваат учениците да не ја земаат за пример моделката Даниела Лојд, чии латински тетоважи се полни со грешки. Додека тетоважите на Бекам и на Џоли се граматички точни, оние на Лојд се безначајни, посочуваат тие. Нејзината тетоважа „Quis attero mihi tantum planto mihi validus“, испишана на рамото, би требало во превод да значи „Вашето потценување ќе ме направи посилна“. Меѓутоа, експертите велат дека ако буквално се преведат зборовите, преводот би бил нешто како „Што јас трошам за мене само за мене силен“.

Бекам, пак, ја има тетоважата „Ut Amem Et Foveam“ што значи „Тоа што го сакам и ценам“ напишана на левата подлактица, додека, пак, на десната има истетовирано „Perfectio In Spiritu“ што во превод значи „Перфекција во духот“. Во меѓувреме, Џоли се одлучи за „Quod me nutrit me destruit“, што значи „Она што ме храни исто така и ме уништува“. Меѓу останатите познати личности што го прифатија овој тренд е и актерот Колин Фарел, кој има истетовирано „Carpe Diem“ или „Зграпчи го денот“ на левата подлактица.

Бордот за испити посочи дека училиштата и учениците се свесни за континуираното влијание на латинскиот и изразиле интерес во квалификациите да се препознае основниот резултат во предметот. Новиот сертификат за почетно ниво на латински е квалификација, која, најверојатно, ќе се изучува меѓу 13 и 17-годишниците. Учениците ќе бидат запознати со латинскиот јазик, вклучувајќи ја и листата од 100 латински збора. Тие, исто така, ќе изучуваат и некои аспекти од римската култура.

Континуираното влијание на латинскиот јазик во секојдневниот живот може да се забележи и во давањето имиња на бебиња. Се посочува дека три од топ четири женски имиња имаат латинско потекло - Оливија од латинскиот збор „оliva“ што значи маслинка, Емили од латинското „аemilianus“ и Грејс од „gratia“ што значи добра волја или добрина.

Пол Дод, квалификациски менаџер за јазици и литература при Одборот за испити, вели: „Латинскиот вокабулар имаше богато и трајно влијание врз англискиот, како и тоа што е основа за модерниот шпански, француски и италијански јазик. „Латинскиот јазик и култура одиграа голема улога во оформувањето на нашите интелектуални, литературни, уметнички и политички традиции“. (Дејли мејл)

Дејвид Бекам, фудбалер

Тетоважа: „Ut Amem Et Foveam“

Превод: Тоа што го сакам и го ценам

Тетоважа: „Perfectio In Spiritu“

Превод: Перфекција во духот



Колин Фарел, актер

Тетоважа: „Carpe Diem“

Превод: Зграпчи го денот



Анџелина Џоли, актерка

Тетоважа: „Quod Me Nutrit Me Destruit“

Превод: Она што ме храни, исто така, и ме уништува



Даниела Лојд, модел

Тетоважа: „Quis Attero Mihi Tantum Planto Mihi Validus“

Превод: (би требало да биде) Вашето потценување ќе ме направи посилна



Кит Урбан, кантри-пејач

Тетоважа: „Omni Vincit Amor“

Превод: Љубовта победува се'