МАЈКЛ ДАГЛАС

Ракот се шири на вратот и на целата глава

За ракот на грлото, т.е. туморот што му беше дијагностициран во почетокот на август, а сега се' повеќе се шири, познатиот актер Мајкл Даглас го обвини својот порочен начин на живот, но и интензивните стресови со синот. „Во чадот од цигарите уживам со децении, исто како и во голтките алкохол, а стресот од претходната година сигурно додаде жар на целата ситуација“, раскажа 65-годишниот актер во неодамнешното шоу на Дејвид Летермен. „Ракот се прошири на вратот и на другите делови од главата. Туморот сега е во својата четврта фаза, односно, со оглед дека се прошири, потешко да се победи и е многу поопасен. Но, јас гледам на тоа како на лечење излечлива болест. Тоа е борба и јас ќе победам“, додаде Мајкл. Очигледно е дека стресот го предизвика неговиот син Камерон, кој во април заврши зад решетки поради продавање дрога. Инаку, неделава заврши со првата предвидена хемотерапија, која, како што рече Даглас, прилично го исцрпила, но полесно ја поднесува со поддршката што му ја дава неговата сопруга, актерката Кетрин Зета-Џонс. Актерката, пак, е многу лута на докторите зашто порано не реагирале и не ја откриле болеста на нејзиниот маж. Оваа 40-годишна убавица рече дека Мајкл повеќе пати се жалел на болки во увото и во грлото, но само пред три недели е дијагностициран туморот со големина на орев под неговиот јазик. „Лута сум на докторите. Требаше многу порано да го откријат туморот. Пројде низ сите можни тестови, а ништо не беше најдено“, рече Кетрин, признавајќи дека туморот претставувал вистински шок.