Над 25 милиони странци ја посетиле Турција

Истанбул - Над 25 милиони странски државјани ја посетиле Турција во првите десет месеци од годинава, покажуваат податоците на турското Министерство за култура и туризам. Во споредба со истиот период од минатата година е регистрирано зголемување од 6,3 проценти.

Најпосетувано место во земјата од страна на странските туристи е Анталија, а на второ место се наоѓа Истанбул.

Германија го зазема првото место на листата, со 22 отсто од вкупниот број странски туристи што ја посетиле Турција. По неа следуваат граѓаните на Русија, Велика Британија, Иран и Бугарија.

Најзначителен пораст е забележан во патувањата до Турција на руските и на арапските државјани. Укинувањето на визите меѓу Русија и Турција го активира туризмот и оваа година руските туристи го надминаа бројот на традиционално присутните Британци. Од блискоисточните држави најголем е бројот на граѓаните на Сирија, кои ја посетиле Турција и изнесува 748.035 туристи, што е двојно повеќе отколку лани. Драстично е намален бројот на израелските туристи во Турција, дури 63 отсто. (МИА)