Вести

Лазаров со шпанскиот Суперкуп

Кирил Лазаров го освои првиот трофеј со својот нов клуб Сиудад Реал со победата од 29:28 над Барселона во 25. Суперкуп на Шпанија. Најдобриот македонски ракометар постигна пет гола и беше најефикасен на теренот во првото полувреме, кога стигна до четири погодока, од кои два од седмерец. Поефикасен од него во победничкиот тим беше само Агинагалде со шест гола.

Квалификации за ЛШ

Металург последен во Порто

Неславниот настап на ракометарите на Металург на квалификацискиот турнир во Порто за Лигата на шампионите е заокружен со пораз и од Запорожје од 25:23 во последното коло, па македонскиот првак заврши на дното во втората група со само еден бод. Место во ЛШ, македонскиот првак ќе игра во Купот на ЕХФ, каде што во второто коло на 2/3 октомври прво ќе му гостува на белорускиот претставник Мешков Брест.

По поразот од Динамо Минск од 27:21 и ремито 24:24 со домаќинот Порто, тимот на Лино Червар остана без мотив, бидејќи во групната фаза од ЛШ отпатува Динамо, па така и му пријде на дуелот со Украинците. Противникот уште при крајот на првото полувреме, практично, го реши прашањето на победникот со водството од 13:6 во 25 мин., иако „металурзите“ во почетокот од вториот дел се приближија на 14:15. До крајот Запорожје не ја испушти предноста, која во еден момент беше 24:20.

Миркуловски со пет гола беше најефикасен во поразената екипа, Левов постигна четири, Алушовски три, Ракчевиќ, Димовски, Милјак и Н. Мојсоски по два и Георгиевски, Стоилов, и Јоноски по еден. Во победничкиот тим се издвои Стецура со девет погодока. (Р.Д.)

Суперлига

Ѓорче Петров загуби во Прилеп

Некогашниот македонски и европски шампион Ѓорче Петров го почна новото првенство во женската ракометна Скопско Суперлига со пораз од 27:22 на гости кај Жито Прилеп. Во другиот одигран меч од првото коло повратникот Гевгелија дома го декласира Кичево со 39:29.

Џудо

Двајца Македонци на СП во Токио

На Светското првенство во џудо што ќе се одржи од 9 до 14 септември во Јапонија, во Токио, ќе настапат и двајца натпреварувачи од Македонија. Тоа се државните прваци во категорија до 81 кг - Ванчо Сарафов и младата Јованка Гусаковска, која ќе настапи во категорија до 57 кг заедно со нив денес преку Истанбул за Токио ќе отпатуваат и селекторот Игор Паскоски, како и водачот на нашата селекција, Благојче Димески, инаку претседател на клубот „Миоки“ од Скопје. Димески со својата фирма „Телесмарт“ е спонзор на клубот и на репрезентацијата на Македонија.

По светското првенство во Токио Сарафов и Гусаковска, со уште пет други џудисти од Македонија, ќе учествуваат и на Балканијадата во Требиње на 24 и 25 септември. (М.М.)