Шок по загинувањето на Томизава

Тимот на Сутер рејсинг е „целосно разнишан“ по смртта на својот 19-годишен мотоциклист Шоја Томизава во завчерашната трка во класата Мото2 во Сан Марино. Томизава падна при полна брзина пред свиокот и потоа беше прегазен од мотоциклите на Алекс де Анџелис и Скот Рединг, кои исто така полетаа во воздухот, но избегнаа сериозни повреди. Јапонскиот возач почина од тешките повреди на градниот кош откако беше префрлен во локалната болница.

„Шоја беше повеќе од пријател. Тој беше како член на семејството“, изјави првиот човек на тимот Ескил Сутер. „Тој беше омилен кај сите во падокот и мене ми е ужасно жал за неговото семејство и за екипата, која ја претрпе оваа трагична загуба“.

Сутер инсистира дека Де Анџелис и Рединг немале шанса да го избегнат судирот со Томизава.

„Чувствувам жал и за Де Анџелис и за нашиот возач Рединг“, додава Сутер. „По првичното сомневање за скршеница на карлицата, кај Шкотот е утврдено дека поминал без сериозни повреди. Но, ментално тој е целосно разнишан, и покрај тоа што ништо од тоа што се случи не беше негова вина. Ова е тажно потсетување дека трките остануваат опасни и покрај сите подобрувања на безбедноста на патеките“.

Возачите од најсилната мотоциклистичка класа Мото ГП за трагичниот инцидент беа информирани по завршувањето на нивната трка, во која победи Дани Педроса.

„Кога ќе се случат вакви работи, ништо друго не е важно“, изјави светскиот шампион Валентино Роси. „Шоја беше прекрасно момче. Ова е страшна несреќа“.

Тринаесетгодишник исто така загина во помала трка пред таа во Индијанаполис во август.

Роси, кој скрши нога во незгода пред Италијанското гран-при во јуни, ги предводеше возачите во оддавањето почит на починатиот јапонски колега Даиџиро Като во почетокот од минатата седмица. Като загина по инцидентот на Јапонското гран-при во 2003 година.