Економската криза се шири на Источна Европа
Лондон - Глобалната економска криза незапирливо се шири и во земјите на Источна Европа, оцени вчера лондонскиот весник „Тајмс“. Весникот се осврнува на фактот дека вредноста на акциите на берзите во Централна и Источна Европа во последната недела оствариле значителен пад.
Постои опасност некои земји од регионот, кои се членки на Европската унија, да го забават процесот на реформите, додека земјите кои се' уште не се членки на Унијата, поради финансиски проблеми би можеле да отстапат од таа амбиција, оценува „Тајмс“.
Балтичките држави, Унгарија, Романија, Бугарија и Хрватска се земјите со најголем степен на ризик за западните инвеститори, наведува весникот.
Овие држави на некој начин се жртви на сопствените политички амбиции, бидејќи правеа се' што ќе им советуваше ЕУ, ги отвораа пазарите за западните инвеститори, ги продаваа своите банки на европски конгломерати, но со тоа нивните финансиски системи станаа ранливи и зависни од многу западни трендови, анализира „Тајмс“. (Макфакс) |
