Во Белфаст по поправање на евробилансот
Работнички вечерва против Крусејдерс во Лига Европа во своето шесто учество во еврокуповите
Сашко Ѓ. Димовски
Фудбалерите на Работнички вечерва (20.45 ч.) во Белфаст ќе имаат можност да го запознаат анонимниот состав на Крусејдерс во воведниот меч од второто елиминациско коло во Лига Европа. Во престолнината на Северна Ирска „романтичарите“ заминаа без грам информации за противникот за кого беше страшно тешко да се дознае нешто повеќе. Како да се работи за тим од друга планета. Локалните медиуми не му посветуваат големо внимание на вечерашниот дуел освен вообичаените најави кои се сведуваат на блиц информации од оние што може да се прочитаат на летоци за секој поголем настан во Скопје од типот кога почнува настанот и кој гостува. Тоа доволно говори за очекувањата на тамошната јавност од нивниот Крусејдерс во двомечот со Работнички. Па, тренерот Стратев е принуден да го запознава противникот на лице место, па ја поведе екипата врз база на претпоставки, нагаѓања, шпекулации, за типот на игра што ја негува Крусејдерс, за играчкиот кадар, за евентуалните засилувања на северноирскиот претставник во ова натпреварување. Од достапните информации може да се види дека Крусејдерс е актуелен освојувач на купот на Северна Ирска и дека во подготвителниот период победи во сите три контролни средби со нисколигаши од кои може да се заклучи дека прима, но и постигнува, многу голови.
Според светски познатиот синџир на обложувалници „Вилијам Хил“, Работнички, важи за фаворит во дуелот со Крусејдерс, барем кога ќе се погледнат коефициентите. Победата на нашиот тим е оценета со 1,80, нерешениот исход „тежи“ 3,30, за победа на Крусејдерс квотата е 3,80. Но, тоа не треба да се зема здраво за готово. Релативно е и не мора ништо да значи како што е релативно и не мора ништо да значи што првиот меч се игра во Белфаст иако гледано во целина Работнички е во предност што ќе биде домаќин во реваншот.
Но, без оглед на се Работнички без сомнение е фаворит во двомечот со Крусејдерс. Ако се имаат предвид настапите на северноирските екипи во првото елиминациско коло во Лига Европа тогаш „романтичарите“ треба да ја прифатат фаворитската улога и сите дилеми да ги разрешат уште на гости. Во воведната рунда претставниците на Северна Ирска беа буквални збришани од нивните противници кои исто така не се звучни имиња. Пример е грузиски Зестафони кој го елиминира составот на Лисбурн со вкупен резултат 11:1 (во Белфаст беше 5:1, во реваншот 6:0). Слично мина и Линфилд во двомечот со Рандерс. Данскиот тим победи со 7:0, во првиот меч на гости Данците славеа со 4:0, на домашен терен со 3:0. За волја на вистината такво нешто не му се случило на еден наш претставник во европските фудбалски купови, па оттука Работнички не би требало да има проблеми со тотално непознатите „крстоносци“ од Белфаст.
На страната на Работнички е искуството, квалитетот и билансот во настапите на меѓународната сцена. Ова е шесто претставување на „романтичарите“ во Европа. Во досегашните пет учества одиграа вкупно 22 меча (квалификации за Лига на шампиони и квалификации за Куп УЕФА) и беа единствен достоен репрезент на македонскиот клупски фудбал надвор од границите на Македонија. Во нив забележаа 6 победи, 7 нерешени резултати и 9 порази и притоа постигнаа 23 гола, а примија 27. Крусејдерс, пак, досега одигра 18 евро натпревари во кои оствари само една победа, три реми и дури 14 порази со дебел минус во гол-разликата (10:58). |
