Во Милано признаваат: Можеби ќе го купиме Ибрахимовиќ

Ариедо Браида, спортскиот директор во Милано, ги заинтригира фановите на „росонерите“ со изјавата „Тешко е, но не и невозможно да го купиме Златан Ибрахимовиќ“.

Веќе подолго време траат медиумските шпекулации кои напаѓачот на Барселона го сместуваат во редовите на Милано, а таму сега и службено се изјаснија.

„Добро го познавам Ибрахимовиќ, тој е фантастичен фудбалер. Проблемот е во тоа што ние имаме тројца-четворица напаѓачи, а има само две или три места. Ако го доведеме него ќе мора некого да продадеме. Сега кога го реков тоа, ќе кажам дека можно е и неговото купување“, изјави Браида и додаде: „Се разбира, тоа не зависи само од нас, туку и од Барселона, а и од самиот фудбалер. Не е лесно да се купи, но не и невозможно“.

Минатото лето Ибрахимовиќ стигна од Интер во Барселона, а трансферот беше тежок околу 40 милиони фунти плус Ето како доплата, според важечкиот тригодишен договор, Ибра во Барселона заработува околу девет милиони фунти по сезона. Договорот му важи до 2014 година.