Работнички елиминиран од Миравци во Купот

Сашко Ѓ. Димовски

Второлигашот Миравци го направи најпријатното изненадување во мечевите од шеснаесет-финалето во фудбалскиот Куп на Македонија, фаза во која се игра само еден натпревар. Како домаќин го елиминира вицешампионот Работнички со 1:0 и обезбеди место меѓу 16. најдобри екипи во ова натпреварување. Победникот беше решен во 85. минута со погодокот на Бучков од пенал.

Но, Работнички не е единствен прволигаш што останува само на еден фронт во сезоната во домашната сцена, првенството. Настапот во Купот го завршија и Скопје и Шкендија, двете елиминирани од второлигаши. Скопјани изгубија во Прилеп од составот на 11 Октомври со 2:1, тетовци беа поразени од Влазними Трим Лум и тоа на пенали (5:4), откако во регуларниот дел немаше победник (3:3).

Вардар преживеа кај Новаци 2005. Пласманот во осминафиналето го заверија по победата со 3:2. Никанчевски (автогол) и Ристевски ги постигнаа головите за домашниот тим, Ацевски, Трифуновски и Пандовски поентираа за „црвено-црните“.

Најубедливата победа ја забележа лидерот на првенствената табела, Металург, чии фудбалери во Ресен ја декласираа Преспа со 7:0. Завидна ефикасност демонстрира и Осогово. Во единствената третолигашка пресметка кочанци беа немилосрдни против екипата на Превалец од Велес со 6:0.

Бранителот на титулата во шампионатот, Ренова, минимално ја совлада Цементарница 55 со 1:0, додека, пак, бранителот на трофејот во Купот, Тетекс, со 2:1 триумфира над Саса во Македонска Каменица.

Резултати од мечевите во шеснаесет-финалето во Купот на Македонија: Осогово - Превалец 6:0, Брегалница 2008 - Охрид Лоте 3:1, Локомотива - Беласица 1:0, Миравци - Работн��чки 1:0, Охрид 2004 - Силекс 0:1, Ринија - Милано (гостите не допатуваа во Гостивар, натпреварот е регистриран со службен резултат 3:0 за Ринија), Новаци 2005 - Вардар 2:3, 11 Октомври - Скопје 2:1, Влазними Трим Лум - Шкендија 3:3 (на пенали 5:4), Баир Кркардаш - Пелистер 1:3, Тиквеш - Дрита 2:1, Преспа - Металург 0:7, Еуромилк - Напредок 1:1 (на пенали 1:4), Карбинци - Хоризонт Турново 0:5, Каменица Саса - Тетекс 1:2, Цементарница 55 - Ренова 0:1.