ЕУ ја критикува Романија за корупција, а ја фали Бугарија

Бугарија ги прифати напорите за реформи и постигна значајни резултати

БРИСЕЛ - Европската унија ја критикува Романија, бидејќи заостанува во напорите за искоренување на раширената корупција, но ја фали Бугарија, исто така, новодојдена членка во Унијата, за напредокот во борбата против корупцијата. Во годишниот извештај за напредокот, објавен вчера, Европската комисија истакна дека на политичарите од Романија им недостасува волја да напредуваат со реформи, така што оваа црноморска земја ги прекршува заложбите за влез во ЕУ. „Додека Бугарија ги прифати напорите за реформи и постигна значајни резултати, Романија го изгуби импулсот, а овој извештај покажува важни недостатоци“, изјави претставник на ЕУ.

ЕУ ги стави двете земји под специјален надзор откако се приклучија кон ЕУ во 2007 година поради долготрајната загриженост за корупцијата и организираниот криминал, што ги одвраќа инвеститорите и го отежнува надминувањето на рецесијата. Во случајот со Романија, корупцијата би можела да го исфрли од колосек нејзиниот договор за помош од ММФ во вредност од 20 милијарди евра, велат некои аналитичари. Комисијата беше посебно загрижена поради новиот романски закон, според кој, агенцијата за борба против корупцијата, што го проверува богатството на политичарите, практично е немоќна. „Новиот закон за Агенцијата за национален интегритет претставува значаен чекор назад во борбата против корупцијата и ги прекршува заложбите што ги презеде Романија при приемот“, се истакнува во соопштението.

Некои дипломати истакнуваат дека постојаните критики за корупцијата ги оправдуваат нивните ставови дека Бугарија и Романија не беа подготвени за приклучување кон ЕУ. Како резултат на тоа, земјите кои се надеваат дека ќе влезат во ЕУ, како Србија или Албанија, ќе се соочат со многу построг надзор, додаваат тие. Со извештајот се бара Романија да ги подобри судовите, кои и натаму се неефикасни, да ги засили судските постапки за корупција на високо ниво и да го подобри процесот на јавни набавки. На позитивна страна, Комисијата ја пофали Романија за неодамнешното донесување на новите кодекси за граѓанска и за кривична постапка.

Прв пат годишниот извештај на Комисијата ја обвини политичката класа на Романија за недостиг на волја да се спречи корупцијата. Но, Комисијата не планира какви било санкции. Тоа би можело да ја одложи соработката со земјата за прашањата од правосудството и од внатрешните работи, или би можело да ги одложи фондовите од ЕУ. „Сега не е време да се зборува за санкции“, изјави портпаролот на Комисијата, Марк Греј, на брифингот за новинарите.

Бугарија добро напредува во однос на корупцијата, се наведува во извештајот, иако треба да ги подобри судовите, да спречи перење пари. (Ројтерс)