Во Јужна Африка најмногу играчи од Премиер-лигата

Продолжуваат проблемите за организаторите на СП 2010, ограбен чилеански навивач

На Светското фудбалско првенство во Јужна Африка се пријавени 736 играчи, од кои дури 447 не настапуваат во своите земји. Од 32 репрезентации, кои изборија учество на Мундијалот само Германија, Италија и Англија отпатуваа со домашен кадар, во селекциите на Шпанија и на Северна Кореја, пак, има само по еден „странец“.

Најмногу гастарбајтери има во селекцијата на Нигерија. Сите 23 фудбалери што се пријавени за настап на СП 2010 играат во клубови надвор од татковината. Репрезентациите на Брег на Слоновата Коска и Камерун имаат по 22 интернационалци во своите редови, по нив следуваат Словенија, Австралија, Србија, Словачка и Уругвај со по тројца пријавени фудбалери од домашните првенства.

На клупски план најмногу претставници на Светското првенство во Јужна Африка имаат Барселона и Челзи. Каталонците и „сините“ од „Стемфорд Бриџ“ ќе имаат по 13 свои членови, Ливерпул има 12, Баерн Минхен 11. Интер, Реал Мадрид, Арсенал и Панатинаикос даваат по 10 свои фудбалери, деветмина доаѓаат од Јувентус, Ајакс и Волфсбург.

Од 736 пријавени играчи најмногу доаѓаат од англиските клубови (119), во Германија настапуваат 84, во Италија 80. Лига со најмногу фудбалери на СП 2010 ќе биде Премиерлигата со 96 играчи, од Бундеслигата има 61, Серија А 57.

Во предвечерјето на Мундијалот продолжуваат проблемите за организаторите на најголемиот спортски настан оваа година. Иако Јужноафриканците упорно повторуваат дека земјата домаќин за време на СП ќе биде безбедна, сепак, реалноста покажува нешто сосема друго. Еден навивач на репрезентацијата на Чиле е опљачкан во хотелот „Пине Лејк ин“ во областа Мпумаланги, 25 километри од Несприут, еден од деветте градови во кои ќе се играат натпреварите на првенството на југот на Африка. Вооружениот разбојник влегол во хотелот, украл пари од рецепција, а потоа го опљачкал и несреќниот Чилеанец додека седел во предворјето на објектот.

„Никој не е повреден ниту, пак, разбојникот пукал со пиштолот. Полицијата се' уште трага по сторителот на ова дело“, рече портпаролот на локалната полиција.