И протести и скапотија, а нашите јуришаат на грчките плажи

Незначителен е бројот на граѓани што летово ќе ја избегнат Грција поради страв од безредија и од високи цени

Миркица Поповиќ


На грчките плажи и летово полесно ќе се разбираме на македонски или на српски, отколку да кршиме јазик на англиски. Бранот штрајкови поради незадоволството од новите економски мерки на владата на Јоргос Папандреу, кои секојдневно ја тресат Грција, летово не влијаат драстично на плановите за одмор на нашите граѓани. Мало влијание имаат и најавите за поскапување на цените на основните прехранбени продукти во маркетите поради покачувањето на ДДВ.

И додека низ светот вртат новинарски стории за лути туристи чиј одмор е принудно изменет поради протестите во Атина, туристи заглавени во главниот град на Грција поради блокадата на пристаништата и јавниот превоз, македонските туристи удобно се сончаат на плажите на Халкидики, Неи Пори, Лептокарија, Платамона и Паралија, но и на островите Закинтос и Крф, кои се се' попопуларен избор.

Од туристичките агенции потврдуваат дека ситуацијата во Грција не влијае врз резервираните пакет-аранжмани. Александар Чоневски од агенцијата „Игуана“ и Ана Крстевска од „Савана“ велат дека кај нив засега нема откажување на аранжманите или двоумење поради протестите. „Повеќе би рекол дека луѓето се двоумат кога да ги планираат одморите поради непредвидливите временски услови“, додава Чоневски. Досега немале проблеми ни со фериботите за островите, иако на неколку наврати поради протестите беа блокирани и пристаништата.

Многу мал број случаи на двоумење дали да се задржи резервацијата поради страв од ситуацијата во Грција имале во агенцијата „Фалкон“. Но, Јасмина Арсовска од агенцијата вели дека оние што се одлучни да одат на одмор се консултираат подобро со агенцијата и на крај одлучуваат да ја задржат резервацијата. „Има реакции од граѓаните, меѓутоа за најголемиот дел случувањата во Грција реално не се пречка за летниот одмор“, истакнува Арсовска, додавајќи дека нивното искуство покажува дека ситуацијата претставена преку медиумите не е ни одблиску толку страшна кога реално ќе се појде таму.

Од овие туристички агенции забележуваат дека Грција останува омилена летна дестинација на нашите граѓани, делумно поради поповолните цени од другите места што се нудат, а, секако, и поради близината. „За разлика од другите понудени дестинации, понудите за Грција се реализираат и подобро отколку што очекуваат агенциите. Едноставно, пазарот го диктира тоа. Пакетите за Грција се интересни од мај до крајот на септември“, потенцира Чоневски.

Годинава продажбата ��а пакет-аранжмани за Грција, според агенциите, е задоволителна. Крстева истакнува дека има дури и мало покачување во продадените аранжмани во споредба со минатата година, иако се' уште се забележува влијанието на економската криза.

Првиот бран туристи, кои веќе се вратија, имале мали забелешки на цените во маркетите во споредба со ланските, како и на цените во кафулињата, но како што истакнуваат од агенциите, нема некоја драстична промена. И самите туристи се запознати со економската ситуацијата во Грција и горе-долу знаат дека не може да очекуваат цени како домашните.

Доколку евентуално поради штрајковите се одложат неколку денови од одморот на туристите, од агенциите велат дека ќе направат се' што е во нивна моќ веднаш да им се излезе во пресрет на клиентите и да се намалат штетите. Сепак, велат дека таква работа влегува во вонредни ситуации, за кои не е виновна самата агенцијата.