Вилијам не ја сака круната на Чарлс

Лондон - Британското кралско семејство ги отфрли како шпекулации тврдењата дека младиот принц Вилијам би можел да биде идниот крал на Велика Британија, место неговиот татко, престолонаследникот Чарлс.

Нема никаква дилема околу тоа дали Вилијам или, пак, Чарлс ќе биде идниот британски монарх, без разлика на многу поголемата популарност во јавноста на младиот принц, поттикната сега и со свадбата со Кејт Мидлтон, на крајот од април идната година, објасни за „Сандеј телеграф“ висок функционер на кралската палата во Лондон. Според неговото објаснување, принцот Вилијам нема намера да се станува лидер на кралството пред татко му и предвреме.

Истражувањата на јавното мислење покажаа дека мнозинството Британци веруваат оти принцот Вилијам би требало да биде идниот крал, дека синот би бил подобар крал од таткото, како и дека Чарлс би требало да се повлече.

Кралското семејство, сепак, не мисли така, инсистирајќи дека младиот принц се чува внимателно од таквите шпекулации, затоа што „многу добро си го знае своето место“ во кралската куќа на која и' припаѓа. Само 15 отсто од Британците сметаат дека принцот Чарлс би бил подобро решение за иден крал. (МИА)