Убедлив триумф над Црна Гора и Вујошевиќ

Македонската кошаркарска репрезентација убедливо ја совлада фаворизираната Црна Гора на Душко Вујошевиќ со 82:58, во првиот подготвителен меч пред августовските квалификации за европското првенство во Литванија.

Уште по првата четвртина кошаркарите на Марин Докузовски имаа предност од 24:14 за на полувремето да биде 42:33. Во тие 20 минути беше видлива огромната желба за победа, иако станува збор за пријателски натпревар.

Таквиот пристап продолжи и во второто полувреме, особено во третата четвртина, која ја добивме со 24:10. Водач на репрезентација на овој натпревар беше Ристе Стефанов кој реализираше 22 коша, а Антиќ и Војдан Стојановски придодадоа 14 коша. Докузовски го проба и новакот Марко Колариќ, кој постигна два коша.

„Задоволен сум од прикажаното. Во одбраната функциониравме одлично. Тие доминираа во дефанзивниот скок, но тоа го поправивме со прецизниот шут. Кошаркарите имаа голема самодоверба, што може да не радува. Не е мала работа на ваков начин да се победи ваков состав“, изјави селекторот Докузовски, кој е задоволен и од физичката подготвеност на своите кошаркари. За неа е задолжен кондицискиот тренер Сандро Бенкардино, кој дојде на повик на директорот на репрезентацијата Врбица Стефанов. Тие двајцата се познаваат уште од деновите минати во Монтепаски.

Инаку, вчера Македонија и Црна Гора требаше да го одиграат и вториот контролен натпревар.

Македонија - Црна Гора 82:58



По четвртини: 24:14, 18:19, 24:10, 16:16. Сала во спортскиот центар Златибор

Македонија: Караџовски 5, Мираковски, Соколов 11, Симоновски, Стефанов 22, В.Стојановски 14, Гоцевски 2, Чековски 7, Д. Стојановски 5, Антиќ 14, Колариќ 2, Самрџиски.

Црна Гора: Кољевиќ 7, Јеретин 10, С. Шеховиќ 4, Се. Шеховиќ, Драгичевиќ 2, Дашиќ 8, Бјелица 2, Голубовиќ 13, Пековиќ 12, Вучевиќ, Мараш, Дробњак.