Лопати и ветувања како да сме во изборна кампања

Партиските штабови се втурнаа во жестоки меѓусебни препукувања

Светлана Унковска

Судејќи според однесувањето на двете спротивставени партии од македонскиот политички кампус, ВМРО-ДПМНЕ и СДСМ, се добива впечаток дека се наоѓаме среде изборна кампања. Владејачката ВМРО-ДПМНЕ на чело со премиерот Никола Груевски повторно ударнички тргна со лопатите на поставување камен-темелници без оглед дали нешто од тоа ќе проработи, да предава во употреба објекти, а не се откажуваат ниту од популистички мерки и настапи. Завчерашното отворање на академската година заедно со осумте илјади новозапишани студенти што се одржа во салата „Борис Трајковски“ личеше на партиски митинг. Секој ден по еден од градоначалниците од редовите на владејачката партија одржуваат прес-конференција на која се презентира што е реализирано, иако од својот кус потрошен мандат има поминато само пет месеци.

Социјалдемократите, пак, по одржаниот Конгрес, откако ја претстави партиската програма, тргна на терен по градовите. Карванот го започна од Струмица. Како што рече лидерот на опозициската СДСМ, Бранко Црвенковски, тргнуваат од овој град за да ги фати маја, за среќа и за добар почеток и за успех на следните избори. Карванот, на што и да личи, предизборен или партиски, продолжува и по другите градови низ Македонија, а социјалдемократите почнаа средби со граѓаните, се дели новата програма.

Партиските штабови во исто време се втурнаа во уште пожестоки меѓусебни препукувања, а особено забележана беше и војната со флаерите и со телевизиски спотови. Се' на се', атмосфера на жестока изборна кампања. Се подготвуваат ли партиите за нови предвремени избори? Ќе го искористи ли ВМРО-ДПМНЕ моментот со оглед на се' погласните најави на позитивен извештај на Европската комисија, а со тоа и препораката за преговори со Унијата, за во почетокот на идната година да се поентира и со визната либерализација? Од владејачката партија велат дека во нивниот табор не размислувале за вонредни избори, туку дека тоа произлегува од опозиционерите.

„Знам дека прашањето го иницираат колегите од опозицијата, бидејќи за нив е несфатливо да се работи секој ден како да е време пред избори. Но, ВМРО-ДПМНЕ даде изборни ветувања пред граѓаните, има програма според која работи и секој ден ќе работи со ист интензитет како да е еден ден пред избори“, истакна координаторката на пратеничката група на ВМРО-ДПМНЕ, Силвана Бонева, во познатиот популистички стил својствен за нив.

Но, се чини дека и СДСМ полека се приклонува кон популизмот како проверена формула која дава брзи резултати, па одлучи „дефинитивно да му се врати на народот и никогаш да не го напушта“. Координаторката на пратеничката група на СДСМ, Цветанка Иванова, вели дека доколку власта одлучи, тие се подготвени за предвремени избори, иако смета дека сега тоа би било само луксуз, кој воопшто не ни треба.

„Тоа еднаш веќе се случи и Груевски покажа дека му е поважен рејтингот отколку државните интереси на Македонија. Наш став за предвремени избори е дека навистина во скоро време ништо не би и' донело корисно“, констатира Иванова.

И од партиите на албанскиот политички кампус не гледаат потреба од нови избори. Министерот за труд и социјална политика, Џељиљ Бајрами, од ДУИ потсетува дека власта имаат четиригодишен мандат и прашања што треба да се решат. „Минатата година имавме предвремени избори и не гледам логика за вонредни избори, особено во моменти кога очекуваме извештај од Европската комисија, значи допрва следува работа за оваа власт“, вели министерот Бајрами.

Ниту Нова демократија, иако е опозициона партија, не гледа причина за повторување на минатогодишната авантура со вонредни избори. „Иако сме подготвени за изборна проверка, на која очекуваме да добиеме двојно повеќе пратенички места, сепак, не гледам реална причина за предвремени избори, затоа што коалиционата влада на ВМРО-ДПМНЕ со ДУИ го има мнозинството во парламентот“, истакнува Бесим Догани од НД.

Од стручна анализа, се смета дека досега работите се движеа според логиката на снежна топка. Изборните успеси на владејачката партија ги намножи нивните „пријатели“, затоа што секој сака да се прикачи на успех, бидејќи тоа ветува добивка. Но, има една психолошка и безбедносна точка, кога сите оние што се чувствуваат загрозени ќе започнат да се обединуваат како опозиција. Тој момент можеби доаѓа или е дојден и се должи на мобилизацијата, пред се', на СДСМ, која ако не покаже дека може да мобилизира, ќе биде уништена од политичкиот противник.

„Сега веќе борбата не е само политичка, туку станува и лична. Има елементи на вендета, на луѓе кои се или ќе бидат уапсени и осудени од власта. Тие сега се бранат со стратегија која на македонската политичка сцена ја лансираше популизмот на ВМРО-ДПМНЕ, а тоа е да се оди меѓу народот,’народот да не се напушти никогаш повеќе’, збивање на редовите на партијата, дисциплина и лојалност на лидерот, слепо верување во моќта на пропагандата и на програмата (без оглед на која партија припаѓа), пред која сите треба да се поклониме“, вели професорката по политички науки Мирјана Малевска. Таа, сепак, смета дека не е лошо „што се размрдала опозицијата“, бидејќи е потребна како контрола на власта. „Владејачката партија може да биде исплашена од евентуалниот успех на опозицијата, но, сепак, таа смета дека е рано да се каже дали и кои фактори ќе одлучат за предвремени избори“, смета Малевска. (Св.У.)