Судот вчера укина одредби од членовите 4 и 6 во Царинскиот закон, врз чија основа „Фершпед“ остана
без дозвола

Соња Маџовска

Уставниот суд пресуди во корист на „Фершпед“. На вчерашната седница Судот укина одредени одредби од членовите 4 и 6 во Царинскиот закон, врз чија основа „Фершпед“ пред четири месеци остана без дозвола за работа во шпедитерскиот бизнис.

Сепак, одлуката на Уставниот суд не значи дека компанијата автоматски ќе ја врати лиценцата за царинско посредување, со оглед на тоа што одлуката на Судот важи од денот кога ќе биде објавена во „Службен весник“, а не и ретроактивно. Тоа, пак, претпоставува дека „Фершпед“, како и другите шпедиции на кои Царинската управа им ги одзеде лиценците за царинско посредување на една година, ќе треба правдата да ја бараат пред Управниот суд.

По одлуката на Уставниот суд се претпоставува дека е можно, но многу тешко веројатно, и Царината сама да го повлече решението со кое неколку шпедиции останаа без дозволи за работа. Првиот човек на Царината, Ванчо Каргов, вчера не сакаше да ја коментира одлуката на Уставниот суд.

„Не знам што значи одлуката на Уставниот суд. Веднаш штом ќе ја добиеме, ќе постапиме соодветно. Иако се обидувавме од Судот да добиеме информација кога ќе се носи одлуката, сепак, немавме можност да дознаеме за да присуствуваме на оваа седница“, вели Каргов.

Тој не можеше да каже ниту дали е можно Царината да ги повлече решенијата со кои неколку шпедиции останаа без лиценци. Според него, се' ќе биде појасно откако официјално ќе ја добијат одлуката.

Од „Фершпед“ се задоволни од одлуката на Уставниот суд, но и внимателни во изјавите. Вчера само кусо соопштија дека ќе ги искористат сите правни механизми за да ја вратат дозволата за работа во делот на шпедитерскиот бизнис, како нивна главна дејност.

Инаку, објаснувањето на Уставниот суд е дека овие одредби од Царинскиот закон се укинати поради тоа што тие се нејасни и непрецизни. Укинувањето се однесува на одредбите со кои се уредува што се подразбира под терминот лице со зголемен ризик, а според Судот не е прецизно определен и периодот на последни 12 месеци, во кои одредено лице има направено долг по основ на ДДВ или акциза.

„Укинувањето на делови од овие одредби е затоа што се нејасни и непрецизни дефинирањата на одредени институти, на пример, што се подразбира под последни 12 месеци лицето-вршител на застапување во царинската постапка да не сторило прекршоци. Нејасноста на одредбите овозможува различно интерпретирање и нејзино применување во конкретни ситуации, а различната примена повл��кува субјективизам на применувачите, што не обезбедува владеење на правото. Укинувањето значи дека со денот на објавувањето на одлуката во ’Службен весник‘ укинатите одредби не се дел од позитивниот правен поредок и не можат да се применуваат“, изјави вчера Југослав Миленковиќ од Уставниот суд.

Според него, досегашната примена на укинатите одредби од Законот во конкретни ситуации, не е прашање од надлежноста на Уставниот суд, туку на редовните судови, а се во зависност од специфичноста на одредени случаи.

Што може да преземе „Фершпед“? Според толкувањата на правниците, оваа одлука на Уставниот суд, сепак, е нов факт, кој може да се употреби во постапката за укинување на решението на Царината, со кое компанијата ја изгуби лиценцата за царинско посредување. Но, таа постапка ќе мора да се води пред Управниот суд. Таква постапка веќе води „Фершпед“ пред овој Суд, што значи дека одлуката на Уставниот суд ќе биде само дополнителен аргумент во нејзина корист.

Сепак, Уставниот суд не поведе постапка за оценување на уставноста на делот од член 4, кој се однесува на казната од 10.000 евра, што беше, исто така, еден од аргументите на Царината при одземањето на дозволата.