Фил Џексон казнет со 35.000 долари поради критикување судии

Дисциплинските органи на НБА-лигата го казнија тренерот на Л.А. Лејкерс Фил Џексон со 35.000 долари поради јавно критикување на судии. Тренерот на Лејкерси ги критикуваше арбитрите по натпреварот со Сакраменто, кој неговиот тим го доби со 106:100.

За Фил Џексон ова е втора казна сезонава поради јавна прозивка на судиите. Претходно беше казнет на 4 април, по поразот од Сан Антонио.

ЛЕРИ БРАУН ДО КРАЈОТ НА КАРИЕРАТА ВО ШАРЛОТ

Иако Лери Браун не е сигурен уште колку ќе трае неговата кариера, сосема е извесно дека за идниот член на кошаркарската куќа на славните Шарлот ќе биде последен клуб што ќе го води.

„Никој друг веќе нема да тренирам“, беше одговорот на 69-годишниот Браун на наводите на медиумите дека можеби ќе ја преземе Филаделфија или Л.А. Клиперс. Сопственикот на Шарлот, Мајкл Џордан, во 2008 година го доведе Браун во клубот, по две години пауза поради лошата сезона во Њујорк.

Лери Браун го доведе Шарлот до својот прв пласман во плеј-офот. Тој не сакаше да каже дали еден ден ќе стане главен менаџер, а додаде дека не се сеќава кога и каде повеќе се забавувал како тренер.


ДВЕЈН ВЕЈД ОДБИ СРЕДБА СО ВНУКОТ НА ЏОН ГОТИ

Кошаркарот на Мајами Двејн Вејд одби да се запознае со Кармин Готи, внук на познатиот мафијашки бос, Џон Готи.

Кармин Готи славел роденден во сепарето на М2 клубот во Мајами каде на влезот го здогледал Вејд. Импресиониран од игрите на овој кошаркар тој побарал од обезбедувањето да му го обезбедат Вејд и конечно да се запознае со него. Сепак, се случи тоа, што „момчињата од подземјето“ најмалку го сакаат - некој да ги одбие, пишува „Њујорк пост“.

Извор близок до „Њујорк пост“ откри дека Вејд не сакал ниту да слушне за потенцијалното запознавање.

„Кога му пришило обезбедувањето на Готи, Вејд само одмавнал со раката и им рекол: „Не ми паѓа на памет да се видам со него или утредента да осамне моја фотографија со Готи“, наведува дневникот.

Изнервирано од однесувањето на Вејд обезбедувањето влегло во вербален конфликт со момчињата на Вејд, по што и самиот Готи слегол до влезот на клубот. Вејд, гледајќи што се случува, едноставно си заминал.