Стари коли веќе не се толку барана стока - цените ќе паѓаат

Околу 30.000 стари возила се продадени за неколку месеци, но над 6,5 илјади стојат на отворените плацеви и чекаат купувачи

Соња Маџовска

Старите возила што се узвезоа до август се продадоа како алва, но од крајот на август веќе се чувствува презаситеноста на пазарот, велат увозниците на половни автомобили. Тие што ги чекаа овие возила, купија уште во првите месеци, но над 6,5 илјади возила сега стојат на отворените плацеви и чекаат купувачи. Ова значи дека ќе паѓаат цените и на старите и на новите возила.

Незначителен е и бројот на бугарските возила што извршиле пререгистрација. Сопствениците на бугарските автомобили се надеваат, а велат дека имале и некои сигнали, дека Владата ќе им попушти со тоа што ќе ја намали каталошката вредност на овие возила, чија старост е над 15 години.

Рокот за пререгистрација на возилата со стандард Еуро1 истекува на крајот од септември.

И додека увозниците на стари возила се офајдија, автоимпортерите на нови автомобили се во депресија. Тие велат дека оваа им е најлоша година досега откако го почнале овој бизнис. И тие, но и увозниците на стари автомобили признаваат дека земјава се наполни со кршот од Европа и дека уште оваа зима сите ќе ги почувствуваме последиците од тоа.

Според официјалните податоци на Царинската управа, заклучно со август во Македонија влегле 44.114 возила, од кои само 4.900 се нови, а дури 36.432 се половни автомобили. Останатите отпаѓаат на увезени товарни возила и на автобуси, исто така, најголем број употребувани.

Од автомобилите, околу 30 илјади веќе ги поминале хомологациските бариери, што значи дека над 6,5 илјади половни возила фаќаат прашина. Шпицот, очигледно, беше достигнат во јули кога во земјава беа увезени над 9 илјади возила, како и во април, мај и јун, кога месечно влегуваа по над 7 илјади стари возила. Ако се земе предвид дека просечните вкупни давачка по возило изнесуваат од 600 до 700 евра, тоа значи дека државата инкасирала околу 25 милиони евра само од старите возила.

Половните возила, главно, се со просечната старост од 10 до 15 години и најчесто се со поминати неколку стотици илјади километри, велат познавачите. За техничката состојба на увезените возила побаравме мислење од м-р Зоран Василевски, директор на Сервисниот центар на „Аутомакедонија“. Тој смета дека техничката состојба на увезените возила е многу лоша и дека на сопствениците на овие автомобили ќе им требаат уште неколку илјади евра за да направат сериозен ремонт. „Застрашувачки е и фактот дека овие возила значително ќе ја нарушат еколошката состојба во земјава, пред се', во Скопје, кој не е во состојба да апсорбира толкава емисија на издувни гасови. Ефектот ќе го почувствуваме сите граѓани веќе оваа зима. Од друга страна, пак, со новиот Правилник за технички преглед донесен неодамна од Министерството за внатрешни работи, се бара при технички преглед возилата да исполнуваат високи еколошки норми, кои тие не можат да ги задоволат. Граѓаните што се решиле да купат такви возила нема да можат да го поминат задолжителниот годишен технички преглед, па ќе биде неопходно на таквите возила да им се направи генерален ремонт, кој во просек би чинел дополнителни неколку илјади евра“, предупредува Василевски.

Што се однесува до хомологациските барања за увезените возила, според Василевски, во Македонија можат да се увезуваат сите возила што поседуваат доказ дека се исполнети еколошките параметри за ЕУРО 1 од страна на производителот на возилото. Тоа, пак, значи дека и возилата што се наменети за други пазари, како американскиот, доколу имаат доказ за исполнетост на ЕУРО 1 нормите може да се увезат во земјава. „Кампањата трае до 30 септември, така што се очекува бројката на увезени возила да биде зголемена за над 20.000, но овој пат и со половни увезени возила со бугарски регистарски таблички. Кога станува збор за овие возила, треба да се има предвид и фактот дека дел од нив се стари повеќе од 15 години и не ги исполнуваат и најниските еколошки норми. Тоа ќе претставува дополнителен проблем за властите во државата, што ќе бара решение, бидејќи овие возила, освен еколошките проблеми, ќе ја нарушуваат и безбедноста на сообраќајот на патиштата“, истакнува Василевски.

Увозниците на нови автомобили се тотално разочарани. Тие велат дека продаваат само по 400 возила месечно. „Пазарот на нови автомобили е во целосна депресија. Никогаш не било полошо. Мал е бројот на увезени, но и на продадени нови автомобили, а односот со старите е 10 спрема 1. Целиот крш од Европа дојде во земјава и од еколошки и од безбедносен аспект. Идејата на Владата дека со увозот на стари возила ќе се обновел возниот парк во земјава, падна во вода“, вели еден од увозниците на нови возила. (С.М.)