Личност на денот

Ким Клајстерс

Додека нејзината 18-месечна ќерка Џејда Ели си играше со победничкиот пехар на Ју-Ес опен, солзите-радосници на Ким Клајстерс зборуваа се'. Само 35 дена по враќањето на тениските терени по двегодишната пауза за да ја донесе на свет Џејда, Белгијката го освои својот втор Гренд-слем трофеј, принудувајќи го и Роже Федерер да и' се поклони, нарекувајќи го нејзиниот фантастичен камбек голема приказна за женскиот тенис. Таа е првата мајка со триумф на еден од четирите најголеми турнири во сезоната по Евон Голагонг на Вимблдон 1980 година.

Екссопругата на Лејтон Хјуит, всушност, продолжи таму каде што застана во 2005 година, кога исто така славеше во Њујорк. Поранешниот женски рекет број еден и во сингл и во дубл е првиот учесник со вајлд-карта што триумфирал на Отвореното првенство на САД. Поради долгото отсуство, немаше ни ранкинг, за веќе по три турнира да излезе на 19. место на ВТА-листата.

Зад името на 26-годишната фиданка на спортско семејство, која тврди дека има фудбалски нозе на татка си Леи и гимнастичка флексибилност на мајка си Елс, стојат 35 ВТА-титули, а покрај двете на Флешинг медоуз има и две финалиња на Ролан Гарос и едно на Австралија опен. Во двојки има триумф на Вимблдон и во Париз, како 11 освоени ВТА-турнири. (Р.Д.)