Претходен број

Обама има ист став со Буш за името

Македонија и Грција да се воздржат од инволвирање колатерални прашања

Од нашиот дописник
Слободанка Јовановска

Брисел - Новата администрација на САД има ист став и ќе покаже иста посветеност кон спорот за името на Македонија со Грција како и претходната на Џорџ Буш, а одговорноста што се' уште нема решение не е само на страната на премиерот Никола Груевски, туку и на грчкиот лидер Константин Караманлис.

Ваквата порака вчера од Брисел ја упати заменик-помошникот државен секретар Стјуарт Џонс, ставајќи јасно до знаење дека по изборите во Грција во јуни, мора да има придвижување околу ова прашање, бидејќи Македонија не смее да остане уште долго надвор од НАТО. За да се постигне тоа, тој побара максимум флексибилност од двете страни, односно и Македонија и Грција да се воздржат од инволвирање колатерални прашања во спорот, бидејќи така не може да се реши.

„Ајде да се фокусираме само на разговорите околу спорот за името и да одиме напред. Преговорите ќе беа покорисни ако не беа вклучени и некои колатерални прашања. Македонија не може и натаму да остане надвор од НАТО и од другите интеграции. Мора да работиме на решавање на ова прашање. Тоа го кажа нашиот лидер на самитот во Стразбур и во Кел. Амбасадорот Нимиц е длабоко инволвиран во овој процес и ги поддржуваме неговите напори. Нема причина да има различно мислење околу ова прашање меѓу претходната и сегашната администрација во САД“, изјави Џонс на брифингот вчера во Брисел. На прашањето дали може да прецизира што подразбира под фокусирање на името и дали тоа го опфаќа и името на јазикот или на нацијата, Џонс одговори дека спорот е многу комплициран и не може да навлегува во детали, но би било добро по изборите за Европскиот парламент, во Грција во јуни да се преиспита повторно ова прашање.


Стјуард Џонс

„Двете страни треба да седнат и да покажат максимум флексибилност за да го решат прашањето и Македонија да стане членка на НАТО, бидејќи 80 отсто од граѓаните го сакаат тоа. Затоа, да се фокусираме на внесувањето на Македонија во НАТО. Најдобро за двете земји е да седнат и да се ангажираат на искрен начин во преговорите предводени од Нимиц“, порача Џонс, како објаснување на претходното барање да се фокусираме на спорот околу името. Тој ги негира тврдењата од Атина дека одбивањето на САД да ја тргнат Грција од листата на земји за кои е задолжителен визен режим е одмазда поради ветото за Македонија, иако поинаков одговор не ни може да даде. Моментно и Словенија од новите земји-членки нема визи со САД, а Хрватска не е ни членка, додека Грција се' уште мора да исполнува услови, иако ниту една стара земја-членка на ЕУ не се соочува со таа ситуација. Според Џонс, процесот на укинување на визите е комплексен и многу технички, но Грција е на добар пат да ги исполни барањата за укинување на визите.

Генерално, тој изрази загриженост за забавувањето на процесот на проширување на ЕУ кон регионот, а по начинот на кој го пренесе тоа, стана јасно дека САД би го оквалификувале многу подрастично. Тоа, според него, ќе биде главната порака што потпретседателот Џо Бајден за време на балканската турнеја ќе ја пренесе во регионот, а до Брисел. Според него, забавувањето на евроинтеграцијата на балканските земји носи голем политички ризик, зашто земјите одговориле многу позитивно на изгледите за членство и ги остваруваат реформите, па ако има одложување, тоа ќе влијае контрапродуктивно. „Ќе видиме забавување на реформите и влошување на политичката ситуација, па затоа треба да ги удвоиме напорите за да тргне процесот и за да ги увериме земјите дека не е запрен“, порача Џонс, кој најави и посета на заменикот на Хилари Клинтон, покрај таа на Бајден, наредните денови на Балканот.