Фуере: Мапата на ЕУ нема да биде цела без Западен Балкан
Панел-дискусија по повод пет години од најголемото проширување на ЕУ и 20 години од падот на Берлинскиот ѕид
По повод петгодишнината од најголемото проширување на Унијата и 20-годишнината од паѓањето на Берлинскиот ѕид, дипломатските претставници на Чешка, Полска, Унгарија, Словенија и на Словачка, заедно со авроамбасадорот во земјава, Ерван Фуере, вчера ги презентираа искуствата на своите земји од пристапувањето и членството во Унијата. Фуере, отворајќи ја панел-дискусијата на која присуствуваа претставници од политичките партии во земјава, цивилниот сектор и медиумите, порача дека „мапата на ЕУ нема да биде цела без Западен Балкан“. Зборувајќи за најголемото проширување на Унијата од пред пет години со прием на 10 нови членки, евроамбасадорот рече оти „сега е предизвик како врз успехот од минатото да се направи проширувањето сега и да се спроведат промените во Западен Балкан“. „Се залагаме ЕУ да остане отворена за другите земји“, порача Фуере. Според него, ЕУ сака да им помогне на земјите од Западен Балкан, но на крајот тие се тие што треба да ја донесат крајната одлука. „Може да ��е постигне успех, но со сеопфатен напор на Владата и дијалог во сите сектори на општеството кои можат да дадат огромен придонес во реформите“, изјави Фуере.
Говорејќи за искуството на Словенија, словенечкиот амбасадор изјави дека целиот процес на зачленување во ЕУ не бил лесен, што Македонија сега може и самата да го види. Берган, сепак, изразувајќи оптимизам, рече оти се надева дека 2009 година ќе биде историска за нашата земја. Полскиот амбасадор Дариус Карол Бачура полските искуства едноставно ги опиша со зборовите „има позитивни и негативни плусови од членството во ЕУ, но сите се плусови“. Според него, ЕУ не е целосна и ќе биде целосна кога сите земји од Западен Балкан ќе станат членки. „Би ве замолил да помогнете да ја составиме сложувалката на ЕУ да стане целосна со вклучувањето на Западен Балкан“, изјави Бачура.
Говорејќи за економскиот аспект од проширувањето, чешкиот и унгарскиот амбасадор Јозеф Браун и Ференц Кекеши истакнаа дека, и покрај големите давачки за евробуџетот, повратниот ефект, т.е. бенефитот, за нивните земји бил поголем.
Констатација на сите амбасадори беше д��ка отфрлањето на Лисабонскиот договор од евроскептичарите не значи дека тие се против проширувањето на Унијата, туку тоа укажува на неуспехот на нивните влади да ги објаснат придобивките од овој процес. Тие изразија мислење дека шенгенскиот ѕид за македонските граѓани треба да падне оваа година. (Т.Г.)
|
