Гласовите на Македонците ќе ја решат трката во Тетово
Хазби Лика (ДУИ) или Сади Беџети (ДПА)
Тројцата кандидати од македонскиот блок во првиот круг освоија девет илјади гласа
Гојко Ефтоски
ТЕТОВО - Кандидатот за градоначалник на Тетово за кого ќе се определат гласачите Македонци многу полесно и поубедливо ќе финишира како победник во вториот круг од локалните избори. Во спротивно, „мртвата“ трка меѓу Хазби Лика (ДУИ) и Сади Беџети (ДПА), двајцата првопласирани кандидати кои изборија учество во финалната рунда на 5 април, ќе биде докрај неизвесна, а за победникот ќе одлучи мала разлика во гласови. Се разбира, под услов да се повтори состојбата од првиот круг во кој Хазби Лика води само со 97 гласа пред Сади Беџети. Првиот собра 11.968, а кандидатот на ДПА 11.871. Во повеќето комбинаторики со можните гласачи во вториот круг, предничат оние кои ќе ги придобијат гласовите од кандидатите-Македонци, кои заедно важат како „трет“ кандидат што не влезе во вториот круг. Тоа беа тројцата од блокот партии на Македонците - Бранислав Светозаревиќ (5.389), Зоран Тевдовски (2.906) и Томислав Стојановски-Бомбај со 960 гласа, или вкупно 9.255.
Овде треба да се додадат уште 2.212 гласа на име на Махмут Јусуфи од Нова демократија, или вкупно 11.467 гласа. Уште една бројка од првиот круг во тетовската општина заслужува посебна анализа. Ова се први избори на кои излезноста на граѓаните била само 46,83 отсто. Најчесто овде се калкулирало со излезност која надминува 70 отсто. Кои се причините за вака малиот одѕив на гласачите е прашање што останува отворено, но истовремено како да е надоврзано на проблемите на кои се укажуваше за поранешните гласања - семејно гласање и полнење кутии, што овој пат навистина не е забележано.
Сади Беџети, ректор на Државниот универзитет во Тетово, инаку редовен професор по анатомија, со сите титули до универзитетски професор, вели дека иако е кандидат на ДПА, тој се чувствува како натпартиски човек. Ако избори победа и се пресели во градоначалничката фотелја, искрено жали за ректорската должност, но се надева дека од позиција на прв човек во локалната самоуправа ќе може да направи многу повеќе и за општината и за универзитетот. Беџети вели дека не знае што содржи градоначалничката функција, но смета на соработка со експерти и луѓе кои знаат како Тетово да се направи европски град со задоволни граѓани и каков ќе изгледа по сто години. „Одлуката е во рацете на Македонците. Сметам дека тие мислат со своја глава, ќе ми ја дадат довербата и ќе победам. Резултатите што ги постигнав во мојот град се потврда за успесите. Никогаш луѓето не сум ги делел по национална или верска припадност. Со сите заедно ќе стартуваме на проекти за општото добро на граѓаните, со што ќе ги решиме виталните проблеми - водоснабдувањето, канализацијата, комуналната, но и стопанската изградба и стимулирање на малите и на средните претпријатија“, вели Сади Беџети.
Кандидатот на ДУИ, Хазби Лика, стартува како актуелен градоначалник со четиригодишно искуство на првата општинска фотелја. Дипломираниот филозоф за тетовската јавност е познат од настаните во 2001 година, кога командуваше со 112 бригада во конфликтот. Потоа се најде и на позиција заменик- министер за внатрешни работи. Сега од своите сограѓани го бара вториот мандат за да ги доврши веќе започнати проекти, особено водоснабдувањето и комуналното уредување на Тетово и селата. „Лично сум задоволен од постигнатите резултати, а мислам дека и граѓаните се задоволни од мојата работа. Сега сметам да се насочам во четири развојни правци: туризам, економија, земјоделство и образование, каде што се неминовни организирани и плански активности. Работев за доброто на сите граѓани, па со право очекувам да ме поддржат сите, независно од верската и национална определба“, нагласува Хазби Лика.
|
