Тројца во битка за Шангај
Лидерот Луис Хамилтон, второпласираниот Фелипе Маса и победникот на двете последни трки Фернандо Алонсо навестуваат тројна битка за Големата награда на Кина. Возачот на Мекларен, кој со своите 23 години в недела би можел да стане најмладиот шампион во историјата на Формула 1, извозе најбрз круг од 1:35,630 минути во утринскиот тренинг на патеката во Шангај долга 5,451 км, а најдобро време забележа и попладнето. Но, Хамилтон доминираше за време на гран-при викендот во Шангај и минатата година, но ја заврши трката заглавен во песочникот и го прокоцка водството од 17 поени што го имаше во однос на Кими Раиконен пред двете последни трки.
Тимскиот колега на Раиконен во Ферари, Маса, кој има пет поени помалку од Британецот, вчерашниот ден го заврши со второ време. Во утринската сесија Бразилецот извзое 1:36,020 мин.
Двократниот светски шампион Алонсо, пак, го продолжи успешното враќање на Рено во вториот дел од сезоната со третото најдобро време попладнето од 1:36,024 мин. Единствениот што покрај Хамилтон и Маса теоретски се' уште е во игра за титулата, Полјакот Роберт Кубица од БМВ Заубер заврши десетти.
Форс Индија ги задржа Физи и Сутил
Џанкарло Физикела и Адријан Сутил ќе останат во Форс Индија и во следната сезона, потврди сопственикот Виџај Малја. Иако ниеден од двајцата возачи не освои ни поен сезонава, и двајцата се пофалени за нивните напори во помагањето на „фенерџијата“ да го намали јазот со конкуренцијата.
„Јасно ставив дпо знаење дека сум среќен со Адријан и со Џанкарло и тие продолжуваат и во 2009“, изјави Малја на прес-конференцијата во Кина.
Предлог: Бод за пол-позиција
Екипите во Формула 1 го разгледуваат предлогот од следната сезона возачот што ќе освои пол-позиција да биде награден со поен. Според „Аутоспорт“, Асоцијацијата на тимовите од Формула 1 (ФОТА) ќе се сретне викендов во Кина за да дискутира за различни начини за зголемување на возбудливоста на овој спорт. |
