Стефановски на подиумот во Сен Жан

Поп Ацев шести на пливачкиот маратон од Гран-при серијата на ФИНА

Ветеранот Томи Стефановски го освои третото место на пливачкиот маратон на езерото Сен Жан во Канада, шеста трка од годинашната Гран-при серија на ФИНА, со награден фонд од 40.000 американски долари. Една недела откако заврши петти на истата локација, но во рамките на Светскиот куп на 10 километри, 40-годишниот Стефановски стигна трет на целта на патеката долга 32 км, на која победи Бугаринот Петар Стојчев, а второто место го освои домашниот пливач Сајмон Тобин. Третиот Македонец што го преплива каналот Ла Манш пред две години оствари време од 6:46,31 часа на 57. маратон во Сен Жан, заостанувајќи 10:01 минути зад Стојчев.

Во конкуренција на 21 учесник што ја заврши трката, од која тројца се откажаа и во која настапија осум пливачки, вториот македонски претставник Евгениј Поп Ацев го освои шестото место. На езерото на кое пред една седмица беше седми на 10 км, тој растојанието од 32 км го преплива за 6:55,11 ч.

Поп Ацев го задржа третото место во вкупниот поредок со 33 бода, а Стефановски се искачи на шестата позиција со 21. На листата фигурира уште само Игор Димовски, кој има десет поени. Води Андреа Волпини со 62, пред Стојчев со 51.

Стефановски и Поп Ацев остануваат во Канада, каде што на 6 август ќе настапат и на маратонот на езерото Магог. на патеката од 34 км ќе се плива за награден фонд од 25.000 долари. (Р.Д.)