Во драматичниот тај-брејк Бразил ја исфрустрира Србија
Финалето на Светската лига во одбојка го следеа рекордни 22.600 гледачи во белградската „Арена“
Бразил повторно кобен за Србија. Како и во финалето од Светската лига во одбојка во 2005 година „кариоките“ и сега во неделата пред 22.600 гледачи во белградската „Арена“ ја совладаа Србија во последниот меч со 3:2 во сетови (22:25, 25:23, 25:22, 23:25, 15:12).
Драматичното финале ќе остане запаметено како вистински спектакл (не се памети кога одбојкарски меч привлекол толку публика). Србија одлично го почна мечот со сјајна организација на капитенот Никола Грбиќ, што и донесе водство од 1:0 во сетови. Но во вториот и третиот сет Бразилците беа за нијанса подобри. Беа поборбени, но ја имаа и онаа неопходна мала доза среќа. Она што се случуваше во завршницата на четвртиот сет долго ќе се прераскажува. При резултат 21:21, смечот на Миљковиќ беше изблокиран во аут, но целокупната клупа на Бразил протестираше, за по петминутни преговори на судиите со записничкатата маса поенот да биде префрлен кај Јужноамериканците, бидејќи топката, наводно, го закачила Миљковиќ при излегување во аут. Но, тоа беше само мотив повеќе за Србите да го освојат сетот со 25:23.
Ништо помалку не беше интересно и во тај-брејкот, кој по предноста од 10:8 за Србија, со сјајните сервиси на Муриљо му припадна на Бразил. „Тешко е. Пак не победија. Полесно е да освоиш бронза, а не вака во финалето да загубиш. Две топки одлучуваа и навистина сум разочаран“, изјави Грбиќ.
Селекторот на Србија, Игор Колаковиќ, му честиташе на победникот: „Во првата половина на петиот сет имавме 8:5 и тогаш помислив дека ќе победиме, но Бразилците беа вистински тогаш кога требаше. Заслужено победија. Дадовме се од себе, но тоа е Бразил“, изјави Колаковиќ. |
