Пекинг против Нобеловата награда за мир

Копенхаген - Кина им се закани со последици на земјите што во декември годинава во Осло ќе испратат свои претставници на церемонијата на доделувањето на Нобеловата награда за мир на годинашниот добитник Лиу Сијаобо.

Според данскиот дневен весник „Политикен“, Кина испратила писма до европските амбасади во Осло и ги повикала да се држат настрана од Нобеловата церемонија.

Секоја европска влада што ќе испрати свои претставници на церемонијата ќе се соочи со последици, рече во петокот на прес-конференција во Пекинг Цуи Танкаи, заменик-министер за надворешни работи на Кина.

„Оваа Нобелова награда е политизирана. Изборот за европските земји и за другите е едноставен. Дали сакаат да учествуваат во политичка игра за предизвикување на кинескиот правен систем или, пак, посакуваат развивање пријателски односи со владата и народот на Кина, на еден одговорен начин“, рече Цуи Танкаи.

Лиу Сијаобо се наоѓа на издржување на 11-годишната затворска казна поради својата опозициска активност.

Кина соопшти дека секоја форма на симпатија за него, изразена од страна на меѓународната заедница, ќе биде третирана како напад на правниот систем на Кина. (МИА)