Почина таткото на Мартин Нешкоски



Утрово во четири часот и петнаесет минути по полноќ, почина таткото на покојниот Мартин Нешкоски, откако пред два дена во обид да си го одземе животот испил неколку голтки солна киселина, јавува „Плус Инфо“.

Животот на Драган Нешкоски со часови го одржуваа апарати, но тој раноутрово ја загубил битката на одделот за интензивно лекување.

Извори од семејството тврдат дека се сомневаат околу лекарската грижа, бидејќи тајмингот на хируршкото отворање, не бил логичен. Иако донесен во болница завчера претпладне, цел ден Драган Нешкоски бил шетан и му биле правени снимки, а дури вечерта телото било отворено, но и веднаш затворено откако се констатирало дека повеќето органи се изгорени, тврдат извори од семејството кои во овие околности инсистираат да останат ан��нимни.

Телото ќе биде предадено на обдукција на судска медицина. Погребот ќе биде извршен утре на гробиштата во скопската населба Нерези во 13 часот.

Мартин Нешковски беше убиен лани на 6 јуни како последица на прекумерна употреба на сила на полицаец. Целиот случај покрена широка граѓанска акција против полициската бруталност, а случајот заврши со пресуда од 14 годишна затворска казна за полицаецот Игор Спасов, припадник на полициската единица „Тигри“. Семејството на Нешковски тогаш изјавија дека не се задоволни од пресудата и дека бараат командна одговорност.