Крушаровска никако да замине во пензија

Заменичката на народниот правобранител, Невенка Крушаревска, по вторпат немаше среќа да замине во пензија, иако уште од 1 септември ги исполнува условите за тоа. Парламентот и вчера не успеа да обезбеди Бадентерово мнозинство за разрешување на Крушаревска - недостигаше само еден глас од немнозинските заедници.

Пред петнаесетина дена, пратениците од ДУИ се изјаснија „против“ нејзиното разрешување, согласно со првичната партиска одлука да се гласа против сите закони од седницата на чиј дневен ред е законот за бранители. Барањето за разрешување на Крушаревска денес беше прва точка на дневниот ред на новата пленарна седница на парламентот, но овој пат против гласаа пратениците од ДПА, додека оние од НДП беа воздржани. Координаторката на пратеничката група на ВМРО-ДПМНЕ, Силвана Бонева, побара поединечно изјаснување на пратениците од заедниците, но и тогаш недостигаше еден глас.

Повеќе „среќа“ имаше Никола Жежов, кој поднел оставка како член на Советот на МРТВ. Парламентот го утврди вчера престанувањето на мандатот на Жежов. Пратеничката Весна Бендевска од СДСМ побара објаснување за предлогот за разрешување на Жежов од функцијата, изразувајќи сомневање дека би можело да се работи за политички притисок.

Претседателот на Советот на МРТВ, Слободан Чашуле, појасни дека Жежов поднел оставка од функцијата за да не дојде до судир на интереси, бидејќи работи и како продуцент на емисии кои можеби ќе се емитуваат и на Македонската радио-телевизија. (П.Р.)