25.09.2012, 15:27 Кралев: Потребно е системско решение за комбинирани паралелки
Министерот за образование и наука Панче Кралев рече дека онаму каде што има мал број ученици од една етничка заедница ќе се применува системско решение, односно одлуката за комбинирани паралелки да биде носена врз јасно одредени правила и критериуми што МОН набрзо ќе ги утврди.
„Во координација со ЗЕЛС веќе работиме на изнаоѓање системско решение за начинот на кој во иднина ќе се донесуваат одлуките поврзани со комбинираните паралелки. Треба да се имаат предвид повеќе фактори, а не само одлучувачкиот фактор дали има доволно простории во некое училиште. Формирана е работна група која ќе изготви систематски пристап и преглед на начинот на кој во иднина ќе се дозволува да се комбинираат паралелки“, изјави Кралев.
Орав: Имате поделба на ученици по етничка припадност
Амбасадорот на ЕУ Аиво Орав, смета дека со воведување нови наставни содржини и обуки на наставниците, професорите, директорите, ќе се создава еднаков пристап за сите ученици во образовниот процес. „Образованието треба да биде исто за сите деца без разлика на нивната попреченост, полова и социјална структура, етничка припадност. Досега во Македонија се правеле проекти за интегрирано образование, сепак се' уште има поделба на учениците по етничка и јазична припадност“, вели Орав.
|
