„Партизанска“ окупирана со семафори

Во план е да се постават нови шест пешачки семафори заради полесно минување преку булеварот, но и за побрз проток на возилата

Деспина Трајковска



На булеварот „Партизански одреди“ семафори почнаа да никнуваат како печурки по дожд. На потегот од Драмски театар кон Соборен храм, од двете страни на сообраќајницата се поставени неколку семафори на пешачките премини. Иако тие се' уште не се во функција, пешаците, а особено возачите веќе почнаа да предвидуваат како ќе се одвива сообраќајот откако ќе проработи светлосната сигнализација. Возачите сметаат дека таа уште толку ќе предизвика метеж во сообраќајот. Велат, непотребно е на булевар да има толку семафори, оти, со тргни - застани, ќе се забави возењето. Пешаците, пак, се радуваат на дополнителните семафори, бидејќи се надеваат дека тие ќе помогнат за побезбедно и побрзо минување преку булеварот.

„Време беше да се постават повеќе семафори зашто само со нив можеме да дојдеме на ред да ја минеме улицата. Сообраќајната култура се' уште ни е под ниво, па ретко кој возач ги пропушта пешаците. Вака, тие ќе бидат принудени да го сторат тоа“, коментира една граѓанка која секојдневно минува во овој дел од градот на патот кон работа.

Во текот на идниот месец и пешаците и возачите ќе го почувствуваат позитивниот „фит бек“ од новите семафори, уверуваат од ЈП „Улици и патишта“ кои ги поставуваат семафорите. Велат, досега е поставена половина од предвидената нова сигнализација. Очекуваат за најмногу еден месец да завршат со монтажата на сите семафори и потоа да ги вклучат.

„Убедени сме дека нема да има поплаки бидејќи семафорите се од заеднички интерес за сите учесници во сообраќајот. Пешаците ќе можат слободно да ги минуваат улиците, а возачите доколку го фатат зелениот бран, ќе можат да возат како на лента“, смета Синиша Ивановски, директор на „Улици и патишта“.

Тој вели дека досега теренците ја завршиле половината од предвидената работа. Ги поставиле семафорите кај Драмски театар и продолжуваат со монтажа на сигнализацијата на пешачките премини кон Соборниот храм. Ќе има вкупно шест семафори. Сите се нови, а се монтираат со современа техника, при која не се сече асфлатот, но, бараат подолго време за инсталација.

Инаку, досега ваков семафор е поставен на булеварот „Климент Охридски“. Тој функционира веќе неколку месеци и од претпријатието велат дека ги дава посакуваните ефекти. Освен овој и планираните шест на „Партизанска“, засега не е во план да се постават пешачки семафори на други локации во градов.

Семафори и во Аеродром, Автокоманда...


Градските власти информираат дека се прават проекции за поставување на уште пет пешачки семафори на „Партизанска“ и наскоро ќе биде решено каде ќе бидат поставени. Покрај овој булевар, со пешачки семафори ќе бидат опремени уште пет локации на неколку фреквентни булевари, како што се „Јане Сандански“, „Александар Македонски“ и „Гоце Делчев“.

„Првите семафори на булеварот ‘Партизански одреди‘ треба да бидат пуштени во употреба на 1 мај, кои ќе бидат вклучени во зелениот бран“, најавуваат од Град Скопје. (Дс.Т.)