24.07.2012, 15:50 На олимпиското мени - од пиле млеко
Повеќе од 330 тони зеленчук и овошје, 232 тона компири, 100 тони месо, 21 тон сирење, 19 тони јајца, 75.000 литри млеко и околу 25.000 векни леб ќе бидат потрошени во подготовка на 1,2 милиони оброци за спортистите што ќе бидат дел од Олимписките игри во Лондон. На организаторот му беа потребни големи подготовки за смислување на менито бидејќи не е воопшто лесно да се подготвуваат оброци за 10.500 луѓе.
„Храната ќе биде поделена на зони - Велика Британија, Европа, Америка и Медитеранот, Азија и Африка. Специјалитети ќе се служат секој ден“, изјави шефицата на кетеринг-службата, Жан Метјуз.
Од најразлични специјалитети до едноставни јадења ќе се најдат на менито на спортистите. Иако желбите се најразлични, сепак домаќинот е подготвен да ги задоволи сите вкусови.
„Ќе има најразлични менија, морска и солена храна, без никакви додатоци, прасечко месо, италијанска кујна, салати, кинески и индиски јадења, речиси се' што беше наведено во барањата што ги добивме од олимписките учесници“, објаснува главниот готвач на ОИ, Пол Дитон.
|
