Српска принцеза - македонски промотор

Српската кралска наследничка досега немала директен контакт со нашата земја, а во мај ќе биде почесен гостин на Охрид

Веле Митаноски



Охрид - Српската принцеза Јелисавета Караѓорѓевиќ, единствената ќерка на кнезот - кралски намесник Павле К��раѓорѓевиќ и на кнегињата Олга, која сега живее во Белград, изрази желба да дојде во Македонија. Таа ова и' го ветила на македонската делегација на неодамна завршениот Саем за туризам во Белград, на кој била специјален гостин на македонскиот штанд. Принцезата била одушевена од вкусот на македонските вина и од македонското сирење, како и од културно-историските вредности и севкупни туристички потенцијали на Македонија кои и' биле презентирани, па решила тоа пошироко да го афирмира.

„Со особено задоволство ја прифаќам поканата да бидам почесен гостин на Агенцијата за промоција и поддршка на туризмот во мај и одблиску да ги доживеам убавините на Македонија“, рекла принцезата, која досега имала само една допирна точка со Охрид, кога во 2008 година за победникот на фестивалот „Охридски трубадури“ испратила Плакета за хуманизам на Фондацијата „Големо срце“.

Принцезата Јелисавета Караѓорѓевиќ е потомок на српската кралска династија која владеела со Србија, а потоа и со кралствата СХС и Југославија. Нејзин владетелски претходник е династијата Обреновиќ. Таа е внука на кралот Александар Караѓорѓевиќ (1888-1934 ), првиот крал на кралството на Србите, Хрватите и Словенците кое тој подоцна го преименувал во кралство Југославија. Татко и', принцот Павле, е прв братучед на Александар Караѓорѓевиќ и бил еден од тројцата кралски намесници (1934-1941) по смртта на кралот Александар.

Караѓорѓевиќи се крвно поврзани и со првата српска владетелска династија - Немањиќ. Се мажела три пати, меѓу кои и со поранешниот перуански премиер Мануел Уљоу Елијас, додека, меѓу два брака имала врска со славниот сопруг на Елизабет Тејлор, пријателот на Јосип Броз-Тито, Ричард Бартон. Државјанка е на САД и на Србија.

Принцезата Јелисавета, која во Белград се врати во 1989 година е мајка на американската актерка Катарина Оксенберг, позната како ѕвезда на холивудската сапуница „Династија“. И таа поседува и српски пасош и е српски државјанин. Во 2004 година принцезата Јелисавета Караѓорѓевиќ се кандидираше за претседател на Србија.

Со владеењето на нејзиното династичко семејство Караѓорѓевиќ, покрај сите негативни историски факти во однос на Македонија, се поврзуваат и два настана од позитивно историско значење, а се однесуваат на Охридско и Струшко. Првиот е враќањето на манастирот „Свети Наум“ од Албанија на југословенското кралство, во времето кога се исцртувала дефинитивната граница, односно се разрешувал дипломатскиот спор помеѓу двете земји по Првата светска војна и толкувањето на Лондонскиот протокол од 1913 година, со кој е повлечена границата со Албанија на западното и јужното крајбрежје на Охридско Езеро од селото Лин до манастирскиот комплекс „Свети Наум“. За големата победа на српската дипломатија и династичкото семејство Караѓорѓевиќ, дури и денеска се говори со пиетет, особено во струшки Дримкол (за зајадливците „Мала Шумадија“). За манастирот „Свети Наум“ има една приказна според која дипломатската битка ја извојувала, па дури и дека го платила во злато тогашната српска кралица, што не е историски потврдено. Меѓутоа, за регионот од неколку села - северозападно од реката Црн Дрим, документирано се знае дека останале од оваа страна на границата, само поради случајноста што регионот си имал свој министер во кралската влада, извесен Шуменковиќ. Дримколци цитираат дека тој му рекол на кралот „Ако тој дел припадне во Албанија, тогаш каде јас припаѓам?“.

И, додека принцезата Јелисавета досега немала директен контакт со Македонија, нејзината роднина, принцезата Катарина де Силва, ќерка на вториот син на Александар II Караѓорѓевиќ, принцот Томислав Караѓорѓевиќ, веќе два пати била во Македонија. И при двете посети била третирана како висока ВИП-личност, почестена со приеми кај двајца наши претседатели. Првиот пат дошла во мај 2007 година и тогаш во вилата „Билјана“ ја примил Бранко Црвенковски. Дошла заедно со кралски наследнички од британското аристократско друштво „Лондон сизн“ во функција на организација на хуманитарен бал, а средствата да ги донира во Македонија. Вторпат дошла во јули 2009 година, кога била примена од претседателот Ѓорге Иванов.