Источна Либија прогласи автономија

Бенгази - Племенските лидери, командантите на паравоените формации и локалните политичари вчера прогласија создавање на полуавтономен регион во источниот дел на Либија.

Церемонијата на прогласување на автономниот регион Источна Либија, кој е богат со резерви на нафта, се одржа во Бенгази, кои ќе биде и политичкиот центар на овој нов субјект.

Еден од иницијаторите на оваа идеја изјави дека прогласувањето автономија е со цел „да се запре децениското маргинализирање“ на Источна Либија, кое потекнува уште од режимот на поранешниот либиски лидер Моамер Гадафи.

Новиот полуавтономен регион ќе се протега од приморскиот град Сирт во централниот дел на Либија, па се' до либиската граница со Египет.

Напоредно со прогласувањето на автономијата, беше формиран и Совет кој ќе ја има улогата на администрација на регионот Источна Либија.

Либискиот Преоден национален совет, кој ја има улогата на привремена Влада до одржувањето на парламентарните избори, досега во неколку наврати се изјаснуваше против идејата за автономија на источниот дел на земјата, нагласувајќи дека тоа би можело да доведе до распад на Либија.