Режисерот Џон Блондел пристигна во Битола

Блондел денеска со 14 актери од битолскиот театар ги почна подготовките за претставата „Хенри Шести“

Познатиот театарски режисер Џон Блондел пристигна во Битола и денеска со 14 актери од битолскиот театар ги почна подготовките за претставата „Хенри Шести“ која ќе биде изведена на културната Олимпијада во Лондон. Актерите на НУ Народен театар-Битола на 12 и 13 мај ќе настапат во светски познатиот „Глоб-театар“ во Лондон, а влезниците кои веќе се продаваат, чинат 35 фунти.

„На фестивалот во Лондон ќе настапат 37 театарски компании кои ќе имаат претстави на својот јазик и тоа е импресивно. Пред две недели овој текст премиерно беше одигран во Санта Барбара, а истражувањето го продолжувам тука во Битола каде во наредните 14 дена ќе работиме интензивно“, посочи Блондел на вчерашната прес конференција.

Во претставата „Хенри Шести“ трет дел, учествуваат Петар Горко, Габриела Петрушевска, Борис Чоревски, Огнен Дранговски, Валентина Грамосли, Мартин Мирчевски, Иван Јерчиќ, Васко Мавровски, Соња Михајлова, Кристина Христова Николова, Николче Пројчевски, Филип Мирчевски, Петар Спировски и Александар Стефановски –Гаргачот. Преводот на текстот го направи Драги Михајловски, сценографијата е на Валенти Светозарев, кореографијата на Рисима Рисимкин, костимографија Благој Мицевски и музика Миодраг Неќак. На 21 март во Битола ќе престојуваат претставници на „Глоб-театар“ и посебна телевизиска екипа од Лондон.