06.03.2012, 14:12 Јамајка се откажува од британскиот трон!
Дебата дали островот да се откаже од кралицата како шеф на државата и да стане република
Принцот Хари во понеделник ќе ја посети Јамајка, како дел од јубиларните прослави на кралицата. Иако веројатно ќе биде топло пречекан, тој, исто така, ќе се најде сред дебатата дали Јамајка треба да ја замени кралицата како шеф на државата и да стане република.
Ако, и кога, ќе се случи тоа, ќе сигнализира прекинување на долготрајните врски со британската монархија. Во централниот парк во Кингстон, главниот град на островот, се наоѓа статуа на кралицата Викторија – еден од многуте симболи на колонијалното минато на Јамајка.
На 5 август 1962 година на полноќ, британското знаме беше спуштено и за прв пат беше издигнато знамето на Јамајка во црна, златна и зелена боја, и беше ставен крај на британската власт од 307 години. Педесет години подоцна, Јамајка се подготвува за посетата на внукот на кралицата. Работниците ја освежуваат со боја резиденцијата на генералниот гувернер, Кралската куќа, а градините се средуваат.
Пред само два месеца новоизбраната премиерка на Јамајка, Портија Симпсон-Милер, вети дека кралицата ќе биде отстранета како шеф на државата. „Треба да го завршиме кругот на независноста. Во тој поглед, ќе иницираме процес на наше одвојување од монархијата, за да станеме република со наш сопствен шеф на државата“, изјави таа во инаугуралното обраќање.
Ова не е прв пат лидерите на Јамајка да го постават ова прашање, но сега се чини дека има политичка волја да се оствари. За време на кампањата за изборите во декември, уставните промени беа едно од прашањата за кои постигнаа согласност двете главни партии, Народната национална партија (ПНП) и Лабуристичката партија на Јамајка (ЈЛП).
За првата фаза од реформите ќе биде потребна поддршка од двете страни за да помине во парламентот и сенатот, а разговорите веќе се започнати.
„Ја почитуваме Велика Британија. Британскиот народ не треба да го сфаќа ова како некој вид омаловажување“, изјави министерот за правда Марк Голдинг. „Не станува збор за тоа, туку за земја што созрева и сака да го репатриира својот суверенитет – и сите сме на тој пат“.
Со поддршка од политичките партии, во втората фаза ќе има јавно гласање на реферндум. За гласањето ќе биде потребно мнозинство од три петтини од електортот, за да се стави крај на монархијата. (Би-Би-Си)
|
