05.03.2012, 14:22 Одземени 10 возила при инспекција на диви превозници
Државниот инспекторат за транспорт при Министерството за транспорт и врски во соработка со Министерството за внатрешни работи, спроведоа акциска контрола на дивите превозници во близина на наплатната станица во Глумово и на неколку локации во Скопје.
Како што соопшти Министерството за транспорт и врски, при извршената контрола во согласност со Законот за превоз во патниот сообраќај, времено се одземени 10 возила кај кои е констатирано незаконско вршење превоз во патниот сообраќај.
Согласно членот 99 од Законот за превоз во патниот сообраќај предвидена е глоба во износ од 500 евра во денарска противвредност за вршење јавен превоз, превоз за сопствени потреби и такси превоз без лиценца, злоупотреба на потврда за членство и возен картон, превоз на патници во меѓуопштинскиот и меѓународниот патен сообраќај без дозвола, и доколку се врши такси превоз спротивно на условите пропишани од страна на советот на општината односно на Советот на Градот Скопје.
Покрај предвидената глоба согласно законот се предвидени и времено одземање на возилото во период од шест месеци до една година.
Против решението на инспекторот за патен сообраќај не е дозволена жалба, а против решението на инспекторот за патен сообраќај може да се поднесе тужба за управен спор во рок од 8 дена од сторувањето на прекршокот. Тужбата за управен спор не го одлага извршувањето на решението за времено одземање на возилото донесено од инспекторот за патен сообраќај. Трошоците кои ќе се настанат за времетраење на спроведување на решението за времено одземање на возило до истекот на рокот за враќање на возилото паѓаат на товар на сторителот на прекршокот.
Во соопштението се наведува дека инспекциската контрола во патниот превоз континуирано и секојдневно ќе се одвива и во следниот период, предвидени се инспекциски контроли во сите градови во Република Македонија со цел воведување ред во превозот во патниот сообраќај и доследно почитување на законските прописи.
|
