Вечерва се отвора 14. Зимски салон

Отворањето е во МСУ, а Зимскиот Салон на тема „Секспресија“ годинава ќе се одржува и во ателјеата на ДЛУМ и во „Галерија 8“, во Безистенот во Старата скопска чаршија

Вечерва во Музејот на современата уметност во 19 часот ќе биде отворен 14. Зимски салон на Друштвото на ликовните уметници, кој годинава на тема „Секспресија“ ќе се одржува и во ателјеата на ДЛУМ и во „Галерија 8“, во Безистенот во Старата скопска чаршија.

На оваа значајна ликовна манифестација ќе гостуваат уметници од Австрија, Словенија, Бугарија и од Турција, а за наградата „Гран-при“ што вечерва ќе биде и доделена од страна на Министерството за култура се натпреваруваат само македонските автори учесници. Салонот ќе биде отворен со перформанс на режисерот Срѓан Јанаќиевиќ.

Годинешниот селектор на Салонот, австрискиот куратор Филип Маурер, од 21 до 23 февруари во Музејот на современата уметност ја изврши селекцијата на пристигнатите апликации и од 87 одбра 39 дела што ќе и' бидат презентирани на публиката. (К.Б.)