Претходен број

Вчера и завчера убиство и пет самоубиства во Македонија

Продолжува трендот на негативни вести во земјава

Пет самоубиства, едно убиство и еден пронајден труп е билансот на црните вести за инциденти и трагедии што во неделата и во понеделникот се случија низ земјава.

Крвава драма, вчераутро околу 6 часот, се случи во куќата на семејството Алексовски на улицата ,,Прохор Пчињски‘‘ број15 во центарот на Куманово. Со два истрела од пиштол, Властимир Алексовски (47) го лиши од живот својот четири години помлад брат Јовица, а потоа се застрела со еден куршум во главата. Властимир е воен старешина - заставник на АРМ, пензиониран пред две години. При увидот од страна судско-полициските истражни органи, покрај телото на постариот брат Властимир е пронајден пиштолот марка ЦЗ калибар 7,62 мм, што го поседувал со дозвола во својство на воено лице во пензија. Случајот во СВР-Куманово по телефон го пријавил еден од соседите, откако слушнал три истрели во куќата на Алексовски, а потоа и пискотници од членовите на семејството. Мртвите тела на двајцата браќа се пренесени на обдукција во Институтот за судска медицина во Скопје.

Никој од потресените роднини и пријатели на браќата Алексовски не сакаше јавно да говори за мотивите на оваа тешка семејна драма. Неофицијално, од соседите се слуша дека двајцата браќа, кои живееле во двокатната куќа, никогаш немале меѓусебни расправии. Постариот, кој живеел на горниот кат од куќата, е женет и татко на две малолетни деца, а помладиот е разведен и е татко на едно машко дете. Според близок пријател на семејството Алексовски, вчера околу 6 часот кај Јовица дошол негов пријател, со кого требало да заминат на работа што ја договориле претходниот ден. Постариот брат Властимир им предложил да им направи кафе пред да заминат и го замолил гостинот да оди по кафе во блиската продавница. По неколку минути, откако гостинот заминал по кафе, соседите слушнале три истрели од оружје.

Допрва ќе се утврдуваат причините за оваа крвава драма, но се претпоставува дека мотивот за братоубиството е тешката социјална положба во семејството, бидејќи извршителот на делото почесто бил во напнато расположение и се жалел дека не може да излезе на крај со ниската пензија, со која издржувал невработена сопруга, две деца и стара мајка.

Трендот на негативни вести што веќе подолго време ја оптоваруваат земјава, го надополнуваат уште четири случаи на самоубиства. Велешанецот Сашо Тасевски (39) вчераутро се обесил во објект во изградба, на кој работел на улицата „Првомајска“ во Скопје. Неговото тело го пронашол вработен во обезбедувањето на објектот.

Во неделата вечерта, на булеварот „Никола Карев“ во Скопје, во објект на поранешна автошкола, бил пронајден мртов Меџаил Исмаили (38), кој во саботата бил пријавен за исчезнат. Трупот на Исмаили го пронашол неговиот постар брат.

Седумдесет и двегодишниот Неџми Фехи од тетовското село Мала Речица си го одзел животот пукајќи си во глава со пиштол, за кој немал дозвола. Стефан Стровјански (23) од Велес се самоубил, скокајќи од својот стан на петти кат на улицата „Благој Ѓорев“ во Велес.

Во МВР информираат за уште еден смртен случај. Шукрие Махмутовиќ (57) од Лажани, Прилепско, вчера околу 9 часот бил пронајден мртов во бунар на патот меѓу селата Костинци и Зрзе. Махмутовиќ во неделата попладне заминал од дома и не се вратил. На неговото тело немало траги на насилство, но обдукцијата во Скопје треба да ги покаже причините за смртта. (Ст.Б.-Г.А.)