Претходен број

Избирачки одбори штимале резултати во Тетово

Неважечките ливчиња кои се броеле како важечки биле ставани на партиски конта

Катица Чангова

Избирачки одбори преправале бројки од гласање и штимале резултати за советници во Тетово. На партиски конта биле ставани неважечки ливчиња кои одборите ги изброиле како важечки. Неправилното внесување на гласачките ливчиња предизвикало хаос во записниците на одборите, а тоа имало влијание во сумирањето на резултатите за освоените мандати.

Вакви запрепастувачки работи откри Државната изборна комисија, кога решавајќи, а вчера на седница и прифаќајќи еден од приговорите на СДСМ, го отвори гласачкиот материјал за 19 избирачки места во Тетово.

Со корекција на гласовите компјутерскиот систем на ДИК исфрли поинакви резултати за освоените мандати на партиите во Советот на Тетово. Така, социјалдемократите во Советот на општината ќе имаат три, наместо две советнички места, за сметка на ДУИ, која наместо 12, ќе има едно помалку - 11 советници. Коалицијата на ВМРО-ДПМНЕ партиципира со четири советници, ДПА со девет, две места освои Нова демократија, а по едно НСДП и ВМРО-НП.

„Се уверивме дека важечките ливчиња биле броени како неважечки, а неважечките како важечки биле ставани на конто на една или на друга партија“, истакна Тања Алтанџиева, член на ДИК. Нејзиниот колега,

Бедредин Ибраими, нагласи дека нема да се толерираат вакви кардинални грешки со броењето на гласовите кои влијаат на резултатите.

„Како е можно пречкртано ливче да биде важечко. Во одборите седат државни службеници“, истакна Ибраими и најави дека ќе бара одговорност за незаконитостите.

Државната изборна комисија на нова седница треба да одлучи дали ќе го прифати барањето на заменик-претседателот на ова изборно тело, Субхи Јакупи, по службена должност да биде поништено гласањето во пет изб��рачки места во општините Тетово и Долнени. Тој побара да биде поништено гласањето на две избирачки места во Општина Тетово - и тоа на 1928 и на 1963, поради тоа што недостигаат ливчиња во изборниот материјал. 

Во врска со барањето за поништување на гласањето во изборните места 1209 и 1210 во селото Житоше и 1471 во село Дебреште, Општина Долнени, Јакупи образложи дека изборниот процес се одвивал само со еден избирачки список и оти во него недостигале потписи.

Претседателот на ДИК, Александар Новакоски, рече дека за ова барање ќе се одлучува на седница, на која треба да се направи и анализа каде треба да се прегласува првиот круг од изборите.

ДИК не го изгласа предлогот на заменик-претседателот да се направи целосен увид во изборниот материјал за уште 73 места во Општина Тетово. Субхи Јакупи изрази дилема во точноста на резултатите од другите избирачки места затоа што, како што рече, немало печати од одбори и недостигале гласови од раселени лица.

ДИК вчера го прифати упатството за утврдување на редоследот на кандидат во гласачкото ливче за втор круг од претседателските и локалните избори кое го сугерираше членот Јован Јосифовски. Прво име на ливчето ќе биде на Ѓорге Иванов, а како второ ќе биде запишано на Љубомир Фрчкоски.