„Телеком Словенија“ нов газда на „Космофон“
Словенците го купија мобилниот оператор за 190 милиони евра
Александрија Стевковска
„Телеком Словенија“ е нов стопроцентен сопственик на мобилниот оператор „Косомофон“ и неговиот продажен синџир „Германос“, соопшти вчера мнозинскиот сопственик на „Космофон“, грчката телекомуникациска компанија ОТЕ. Вкупната вредност на трансакцијата изнесува 190 милиони евра. Купопродажниот договор е даден на разгледување и одобрување кај државната регулаторна власт.
Купопродажниот договор беше потпишан од Бојан Дремељ, претседател на менаџерскиот одбор на „Телеком Словенија“, и Михаел Цамас, генерален директор на групацијата „Космоте“.
Групацијата „Телеком Словенија“ е една од најраширените телекомуникациски оператори во Југоисточна Европа. Во 2008 година продажната мрежа на групацијата достигна приход од 842,4 милиони евра и заработка од 312,2 милиони. Групацијата има повеќе од 320.000 Интернет-приклучоци, 1,5 милион мобилни корисници и 650.000 корисници на фиксна телефонија во регионот на Југоисточна Европа.
„Со огромно задоволство изјавуваме дека потпишавме договор за купување 100 проценти од акциите на ’Космофон‘ и ’Германос‘. Ова преземање ги надополнува нашите постојни активности во Македонија и ја продолжува нашата стратегија за прераснување во еден од водечките телекомуникациски провајдери во Југоисточна Европа”, изјави Дремељ по потпишување на договорот.
Според Цамас, групацијата е задоволна од успешното завршување на процесот на продажба на „Космофон“ и „Германос“ и од интересот што го покажаа повеќе телекомуникациски групации. „Би сакале да се заблагодариме и да им честитаме на ’Телеком Словенија‘, како и на сите страни кои беа вклучени во овој процес. Исто така, им посакуваме голем успех во иднина и на луѓето со кои работевме како ��ленови на групацијата ’Космоте‘. Верувам дека ’Телеком Словенија‘ ќе го продолжи успешниот пат на предизвикувачкиот македонски пазар“, истакна Цамас.
За купување на вториот мобилен оператор, освен „Телеком Словенија“, понуди доставија и турските компании „Турк телеком“ и „Туркчел“. Инаку, „Космофон“, кој почна со работа во јуни 2003 година, ја заврши минатата година со над 700 илјади корисници, додека „Германос“ во Македонија е присутен со 66 продажни места.
Новиот газда на „Космофон“, групацијата „Телеком Словенија“, веќе е присутна на македонскиот телекомуникациски пазар преку „Он-нет“, вториот по големина Интернет-провајдер во земјата, кој нуди и фиксна телефонија и кабелска телевизија.
Продажбата на „Космофон“ следуваше откако германски „Дојче телеком“ купи 25 проценти од акциите на ОТЕ, мнозинскиот сопственик на „Космофон“. „Дојче телеком“ е сопственик на првиот македонски мобилен оператор „Т-мобиле“, а со купувањето на акциите од ОТЕ се создаде недозволена концентрација на македонскиот телекомуникациски пазар, па како единствена опција за надминување на овој проблем се наметна неговата продажба. |
