АЕК идниот месец ќе се изјасни за четврти мобилен оператор

Агенцијата за електронски комуникации до крајот на октомври ќе се произнесе дали во Македонија има простор и потреба за четврти оператор во мобилната телефонија. Ова на вчерашниот прес го изнесе портпаролот на АЕК, Марјан Пејовски, одговарајќи на новинарско прашање. Тој појасни дека во тек е истражување на агенцијата, кое треба да даде одговор на прашањето дали на македонскиот пазар му е потребен уште еден мобилен оператор. Пејовски негираше дека АЕК доставила препорака до надлежното Министерство за транспорт и врски дека има потреба од четврти мобилен оператор.

Во анкетата што деновиве ја спроведе АЕК, со цел да се испита мислењето на корисниците за квалитет на услугите на пазарот на електронски комуникации, било поставено и прашањето за нов мобилен оператор. Дури 77 отсто од корисниците на мобилната телефонија позитивно се изјасниле на прашањето дали сметаат дека има потреба од повеќе компани, кои нудат услуги на мобилната телефонија. Доколку на пазарот се појави нов оператор во мобилната телефонија, 81 процент од анкетираните одговориле дека треба да понуди подобри цени за разговор за да станат негов корисник. За седум проценти изборот на евентуалниот нов оператор би зависел од квалитетот на услугите, а за три проценти подобрите цени за СМС и за ММС- пораките.

Истовремено, дел од постојните оператори сметаат дека на мал пазар, како што е македонскиот, нема простор за повеќе од три оператори, иако од друга страна нагласуваат дека не стравуваат од конкуренција. (Ек.Р.)