Лозарите обвинуваат: Откупот на грозјето годинава е катастрофален

Лозарите обвинуваат дека откупот на грозјето годинава е катастрофален, бидејќи винарските визби не го почитуваат договореното. Според нив, за килограм „вранец“ се нудат од шест до осум денари, а „смедеревката“ се презема на диво, од седум до осум денари. Тие сметаат дека поради ваквата ситуација годинава дивото производство на алкохол ќе биде трипати поголемо од лани. Винарските визби, пак, информираат дека откупот се одвива нормално, без никакви проблеми и според предвидената динамика. „Винарите повторно не' измамија. Сега не ни останува ништо друго, освен да ја завршиме бербата. Грозјето нема да го даваме без пари, ќе се снаоѓаме кој како знае и умее. Во секој случај, трипати ќе се зголеми дивото производство на алкохол“, изјави Љупчо Аризанов, претседател на здружението „Агротиквешија“.

Според него, за „вранецот“ веќе речиси и нема интерес, а извозот како опција не ветува многу зашто е мал бројот на заинтересирани странски откупувачи. Лозарите не планираат повторно да протестираат. Сметаат дека тоа не е решение за проблемот што се појавува секоја година. „Со блокадите на винарските визби сакавме само да постигнеме договор што ќе ги задоволи двете страни. Бидејќи винарските визби не го почитуваа ветеното, можеме единствено да се фокусираме на производството за идната година зашто сегашното секако пропадна“, истакна Аризанов. Откупните цени годинава се малку пониски, се согласуваат од визбите, но причина за тоа е послабиот квалитет на грозјето. „Квалитетот, практично, ја диктира цената. Доколку лани грозјето во просек имаше по 21 шеќерна единица, сега содржи околу 17. Затоа ’вранецот‘ го откупуваме по девет денари, но за родот што имаше над 20 шеќерни единици плаќавме по 12 денари. Откупот, сепак, се одвива според утврдената динамика“, вели Ванчо Кузманов од „Повардарие“. И во винарската визба „Тиквеш“ количествата се преземаат во согласност со планот и склучените договори. Цената на „вранецот“ е пониска од ланската, но на ниво од 2006 и од 2007 година, а на „смедеревката“ е приближно иста како лани, вели директорот Ѓорѓи Петрушев. (МИА)